ملتان۔ 08ستمبر (اے پی پی) خاتون اول ثمینہ عارف علوی پارینے کہ پاکستانءِ سہی وڑاٹ آسودہی ریاست اس جوڑ کننگ کن ہربندغ تینا کڑد ءِ اداکے۔ خصوصی بندغ آتیا چکار کرسا اوفتے راج انا فائدہ تروک ءُ شاری جوڑ کننگ مریک۔ نیک نیتی اٹ بناکروک آ کاریم تینا مزل آ سرمریک۔ چلڈرن کمپلیکس ملتان چناتا است انا سرجری نا بناءِ کرسا اہم ءُ مزل اس سرتسنے، ہراڑکن داجاگہ نا انتظامیہ و غیرسرکاری تنظیم ”تارے زمین آ“ مبارکبادناحقدار ءِ۔ داخیال آتا درشانی ءِ او چارشنبے نادے آ چلڈرن کمپلیکس ملتان اٹی چناتا است انا سرجری نا یونٹ نا بناءِ کننگ نا دود آن تران کرسا کرے۔ ثمینہ عارف علوی پارے کہ کنکن اینو خوشی نادے اسے کہ ای اینو ولی تا دھرتی آ ساڑی اُٹ۔ داڑے این جی او ”تارے زمین پر“ نا سی ای او فادیہ کاشف انسانیت نا راجی آسراتی کن بھلوخذمت اس سرتننگ ءِ۔ اوپارے کہ ای راج اٹ مثبت بدلی و خذمت سرتروک آ سخی تیان ہم خواست کیوہ کہ او ہم فادیہ کاشف کون آ ڈٹ آتیا کاریم نا بناءِ کیر انتئے کہ اینو چلڈرن کمپلیکس ملتان اٹ چناتا است انا سرجری نا یونٹ نا بناٹی پنجاب حکومت تون ”تارے زمین پر“ نا ہم پبی کمک اوار ءِ۔ خاتون اول پارے کہ اینو ملتان نا تاریخ نا اسہ اہم ءُ دے اسے و داسہ داجاگہ نا الس نا است انا مرض آتے ٹی اختہ چناتا درمان کن لاہور و ایلو شاری تیا ہنوئی تمپک۔ اوپارے کہ ہرڈٹ انا بناٹی متحرک شخصیت آتا است خواہی المی مریک و حکومت داوڑنا بندغ آتا پبی است بڈی ءِ کے۔ ثمینہ عارف علوی مستی پارے کہ ننا راج انا زالبول آک ہم ملکی شونداری ٹی زیات آن زیات بشخ ہلیر انتئے کہ حکومت ہم راجی پروگرام تیا پبی چکار تخنگ ءِ ہرافتا پیدوار درور احساس پروگرام، سرسہب ورنا پروگرام و ایلو ڈٹ آک اوار ءُ۔
