اسلا م آباد۔ 07ستمبر (اے پی پی) پاک فضائیہ مچ آ ملک اٹی تینا غٹ ایئر بیس و تنصیب آتیا 7ستمبر ءِ شہید آتا دے انا وڑاٹ اڈتس۔ دے انا بناءِ 1965و 1971نا جنگ آتا شہید و ہمو غٹ بندغ آتے کن خصوصی دعا و قرآن خوانی اٹ کننگا ہرافک پاکستان نا جوڑ مننگ آن ہلیس داتم اسکان لمہ وطن کن تینا جان تے ندر کریر۔ داچرجوئی ٹی مرکزی دود ایئر ہیڈ کوارٹرز اسلام آباد اٹی اڈتننگا۔ سروک پاک فضائیہ ایئر چیف مارشل ظہیر احمد بابر سدھو دود انا مہمان خاص ئس۔ 7ستمبر نا یات گار و تاریخی دے انا وخت آ تران کرسا ایئر چیف پاک فضائیہ نا ہموغٹ ہیروتے خراج تحسین پیش کرے ہرافک مدام بے مٹ نرزوری اٹ قوم انا توار آ لبیک پاریر و عظیم مسخت کن ایلوتیان مون آ ہنسا تینا جان تے ندر کریر۔ ایئر چیف پارے کہ پاک فضائیہ ڈیہہ نا بدل مروک حالیت آتیان باخبرءِ و پاکستان نا سالمیت و وقار نا دفاع کن پورو تیار ءِ۔ داخاص دے انا وخت آ اوہموغٹ کشمیری تتون ہم یکجہتی نا درشانی ءِ کرے ہرافک آجوئی نا خاطر جنگ ترسا تینا جان تے ندر کریر۔ اوکشمیری ایلم و ایڑھ تے اخلاقی، سیاسی و سفارتی کمک نا پورو باورکرفے۔ شہید آتے خراج عقیدت پیش کننگ کن ایئر چیف یات گار شہید آتیا پھل آتا چادراس شاغا و دعاپاتیا کرے۔ دود اٹی پرنسپل اسٹاف آفیسر، آفیسر آک، ایئرمین و سویلین آتا اسہ بھلو کچ اس بشخ ہلکر۔ داکان مست دا تاریخی دے انا رداٹ کراچی ٹی پائلٹ آفیسر راشد منہاس شہید(نشان حیدر) نا قبرآ ایئر وائس مارشل زعیم افضل، ایئر آفیسر کمانڈنگ، سدرن ایئر کمانڈ سروک پاک فضائیہ نا کنڈآن پھل آتا چادر اس شاغا و دعاپاتیا کرے۔ مچ آملک اٹی پاک فضائیہ نا ایلو شہید آتا قبرآتیا ہم ہنداوڑنا دود اڈتننگا۔
