کوئٹہ۔6ستمبر (اے پی پی): پاکستان دیمپانی ءِ موہ ءَ بلوچستان ءِ سروزیر جام کمال خان ءَ گشتگ کہ پاکستان ءِ راج دپتر ءِ تہا 6 ستمبر ءِ روچ مئے بہادریں سلاھ بندیں فوج ءِ جرات بہادری ءُ قربانی ءِبے مٹیں درور اِنت، پاکستان ءِ راجی دیمپانی ءِ روچ پاکستان فوج ءُ راج ءِ جزبگ ءُ بہادری ءِ یات ءَ گیج ایت، مرچی سرجمیں راج ماتیں وطن ءِ دیمپانی ءِ ھاترءَ وتی جاناں ندر کناں ء ُوتی شہیدآں سُریں سلام پیش کناں۔ اے ھیالانی درشانی آئی ءَ دیمپانی ءِ روچءِ موہ ءَ وتی کلوہءِ تہا کتگ، بلوچستان ءِسروزیر جام کمال خان ءَ گشتگ کہ مئے دائمی دُژمن مرچی ہم مئے ھلاپ ءَ پندل سازگ ءَ اَنت، آئی ءَ گشتگ کہ پاک فضائیہ ءِ ورناہ آں 1965 ءَ دژمن ءِ گوما بالی جنگ ءَ بہادری ءِ راج دپتر جوڑ کتگ۔ آئی ءَ گشتگ کہ 27 فروری 2019 ءَ ہم پاک فضائیہ ءِ شاہیناں بھارت ءِ دو جنگی گراب جتگ ءُ دور داتگ اَنت ء ُ راج ءِ سر چہ پھر چست کتگ۔ آئی ءَ گشتگ کہ راج پاک فضائیہ ءِ شکر ء ُمنت ءَ گپت۔ سروزیر ءَ دیمپانی ءِ روچءِ درگت ءَ گشتگ کہ راج پاکستان ءِ دیمروئی، امنءُایمنی ء ُ سلامتی ءَ را الم کنگ ءِ ھاترءَ 1965 ءِ وڑءَ مرچی ہم محکم اِنت۔ جام کمال خان ءَ گشتگ کہ مارا اللہ تعالیٰ ءَچہ دعا کنگ لوٹ ایت کہ آ مارا وتی پاکیں سرڈگار ءِ رکینگ ءِ ہمت ءُ وس ءُ واک ءَ بہ دنت۔
