اسلام آباد۔ 03ستمبر (اے پی پی) وزیراعظم نا وژن نا رداٹ پبی کوشست آتا سوب آن سویلی بلوچستان ڈویلپمنٹ پیکج نا فیز I ءِ سرسہبی اٹ پورو کننگا۔ پی ایس ڈی پی 2021-22اٹی منظور مروک ڈٹ آتا لڑ سازی و منظور مروک ڈٹ آتے کن فنڈ آتا بشخنگ آ ترندی اٹ عملدرآمد ءِ پک کننگ انگ ءِ، سویلی بلوچستان شونداری ڈٹ انا فیز II آ پیش رفت ترندی اٹ مننگ ءِ۔ وزارت ڈٹ بندی، شونداری، اصلاحات و خصوصی گام گیج نا کمامدارآتارداٹ بنجائی حکومت اٹ سویلی بلوچستان نا 10ضلع غاتے کن وزیراعظم نا پوسکن آ پاکستان شونہال سویلی بلوچستان پروگرام کن 600ارب روپئی نا شونداری ڈٹ آتا بناءِ کننگانے۔ وزارت ڈٹ بندی، شونداری، اصلاحات و خصوصی گام گیج داپروگرام ءِ عملی دروشم اس تننگ کن جامع ڈٹ بندی نا بناءِ کرینے۔ ہراڑآن آواران، چاغی، لسبیلہ، پنجگور، واشک، کیچ، تربت، خاران، خضدار و گوادر نا ضلع غاتا 36لکھ آبادی فائدہ ہرفک۔ داپیکج نا رداٹ 1100کلومیٹر سڑک آتا تفنگ آن ہندی آبادی کن آسان ہن و بر و منڈی اسکان رسینگ دوئی مریک۔ 3لکھ آن زیات اُراتے بجلی و 100درسد اُراتے گیس انا فراوانی ءِ پک کننگک۔ 16پوسکن آ ڈیم تا تفنگ آن اسہ لکھ 50ہزار مربع ایکڑ ودکی بنجر ڈغار ءِ دسنگ نا قابل کننگک، اسہ لکھ آن زیات ہندی بندغ آتے روزگارنا وارخواہی دوبریک۔80ہزار آن زیات چناتا وسیلہ تعلیم ناکمک اٹ اسکو ل آتے ٹی اندراج کننگک۔
