اسلام آباد۔ 03ستمبر (اے پی پی) وزیراعظم عمران خان پارینے کہ مچ آ دنیا ٹی چاگڑدی بدلی، نیزگاری و غذائی بے رکھ بھلو چیلنج ءُ، پدتموک ملک آتے کن غذائی کاختی بھاز بھلو ویل اسے، نیزگاری نا چٹفنگ کن چین رول ماڈل ءِ، کوویڈ۔ 19نا جہانی دین اقتصادی تنکی ءِ ودی کرینے، احساس پروگرام کورونا نا زرگزرانی ویل آتا مون ءِ توننگ اٹ کمک تس، پاکستان چاگڑدی بدلی تا مقابلہ ءِ کننگ کن زبردست گام گیج کرینے، 10بلین ٹری ڈٹ انا رداٹ داتم اسکان اسہ ارب درخت خلکونن، چنساؤ ٹیکنالوجی نیزگاری نا چٹفنگ و پائیدار شونداری کن جوان ءِ۔ داخیال آتا درشانی ءِ او جمعہ نادے آ چین اٹی اڈ ہلوک آ چنساؤ کمکار و پائیدار شونداری کمکار فورم نا 20می سال دے انا وخت آ ویڈیو لنک انا کمک اٹ تران اٹ کرے۔ وزیراعظم چین ءِ دا فورم نا مہمانداری و پروفیسر لین ءِ ”چنساؤ“ ٹیکنالوجی نا ایجاد آ مبارکبادی ترساپارینے کہ دافائدہ تروک ٹیکنالوجی آن دنیا نا 100آن زیات ملک تدوک آ 20سال آن فائدہ ہرفنگ ءُ و داتم اسکان ہزار آ بندغ آک داڑآن فائدہ ہرفینو۔ وزیراعظم پارے کہ دنیا ءِ بالعموم و کرہ ارض انا سویلی بشخ اٹ رہینگوک آ بندغ آتے خاص وڑاٹ چاگڑدی بدلی، نیزگاری و غٹ آن زیات غذائی بے رکھ اتون اوار کیہی چیلنج مون تروک ءِ۔ نیزگاری نا غٹ حالیت آتاچٹفنگ نا کوشست آتا سوب آن تدوک آ اِرادہائی ٹی شدید نیزگاری ٹی چرجوئی اٹ کمتی برساکرینے ولے کوویڈ۔ 19نا جہانی دین اقتصادی تنکی ءِ ودی کرینے ہراڑآن داکنڈآ بروک گچینی سست روی نا گواچی مسنے، تدوک آ 20سال اٹی اولیکو وار سال 2020ء ٹی نیزگاری ٹی ودکی خننگانے، پدتموک ملک آتے کن غٹ مخلوق ءِ خور و گچین غذائیت نا فراوانی زیات بھلو چیلنج اس مرسا مون آ بسنے، جہانی دین انا دا دور اٹی اقتصادی بحالی، ودکی و شونداری نا دوئی کننگ نا بابت پائیدار ذریعہ اختیار کننگ بھاز اہمیت تخک۔ ”چنساؤ“ ٹیکنالوجی ہنداوڑ اسہ ذریعہ اس جوڑ مننگ کیک، داچنکا بزغرآتے کم خڑچ اٹ بھلو کچ اسے آخپا تا دسنگ اٹ کمک فراوان کیک، داکان بیدس دا ٹیکنالوجی ڈغارتے بنجر مننگ آن بچفنگ اٹ کمکار مننگ کیک، نیز زیات کچ اٹ پروٹین نا حامل مننگ نا سوب آن ساہدار تا بئے انا وڑاٹ کاریم اٹ اتنگ مریک۔ وزیراعظم پارے کہ نیزگاری نا چٹفنگ نا بابت چین پدتموک ملک آتے کن رول ماڈل اسے، تدوک آ چار دہائی ٹی چین تینا شاندار شرح نمو اٹ 80کروڑ بندغ ءِ نیزگاری آن کشانے۔ وزیراعظم چاگڑدی بدلی تا بابت چین نا قائدانہ کڑد انا ہم ستاءِ کرینے۔ اوپارے کہ ای صدر شی جن پنگ نا شونہال، ساف ستھرا و زیباانگا دنیا نا تصور نا ستا ءِ کیوہ، نیز اونا دنیا ءِ سال 2060اسکان کاربن نا اثرآتیان پاک کننگ نا تصور ہم سفت نا قابل ءِ۔ وزیراعظم پارے کہ نیزگاری نا چٹفنگ و چاگڑدی بدلی تا مقابلہ کنا حکومت نااہم انگا اولیت آتیان ءِ، نن بھلو کچ اسے آ راجی رکھ انا فراوانی نا پروگرام ”احساس“ نا بناءِ کرین، داپروگرام نا مسخت پسماندہ بندغ آتا زند اٹ گچینی اتنگ، نیزگاری نا چٹفنگ و نزور خاہوت آتے کمک فراوان کننگ ءِ۔ وزیراعظم پارے کہ ننا ”احساس“ کیش پروگرام جہانی دین”کوویڈ۔ 19“ نا ننا آبادی آ تموک آ زرگزرانی اثرآتیان رکھ فراوان کننگ اٹ اہم کڑدادا کرے، چاگڑدی بدلی تیان غٹ آن زیات زہمی ملک آتیان اسٹ مننگ نا سوب آن پاکستان دا عفریت نا چٹفنگ نا جہانی کوشست آتا پبی مخ تفی ءِ کیک۔ وزیراعظم پارے کہ موسمیاتی بدلی و چاگڑد نا بابت ننا ایجنڈا زبردست و پیدوار ءِ و نن ساف و سرسوز پاکستان نا کنڈآ ہِننگ اُن، نن 10ارب درخت خلنگ نا ڈٹ انا رداٹ داتم اسکان اسہ ارب درخت خلکونن، جنگل آتا بحالی و ودکی ننا اولیت آتے ٹی اوار ءِ، خرنی ٹی ودکی نا ننا گام گیج، اقوام متحدہ نا عشرہ بحالی، چاگڑدی نظام2021آن 2030اتون ہم گرنچ ءِ، ننے اومیت ءِ کہ ننا دا گام گیج چاگڑدی نظام اٹ بگاڑ آن بچنگ، اودے توننگ و داٹی گچینی اتنگ اٹ تینا کڑد ءِ ادا کیک۔ وزیراعظم پارے کہ کنے داہیت انا خوشی ءِ کہ چنساؤ ٹیکنالوجی نیزگاری نا چٹفنگ و پائیدار شونداری کن ننا راج و زرگزران کن جوان ءِ، داوڑنا پوسکن،اڑزآن و چاگڑد دوست ٹیکنالوجی پائیدار شونداری نا بنائی اِرامسخت یعنی نیزگاری و بین نا چٹفنگ نا دوئی کننگ اٹ کمکار مریک۔ ننا نیزگاری نا چٹفنگ نا قومی پروگرام ہرامخلوقءِ زرگزران نا فراوانی، میرات آتے ٹی ودکی و تربیت نا فراوانی ءِ پک کننگ ءِ، چنساؤ ٹیکنالوجی نا شریداری اٹ اہم ءُ کڑد اس ادا کننگ کیک۔ وزیراعظم پارے کہ نیزگاری نا چٹفنگ وپائیدار شونداری نا دوئی کننگ نیز چاگڑدی بدلی تتون مون تننگ نا بابت جہانی کوشست آتے ٹی ننا تعلقداری و ارادہ مصمم ءِ۔
