اسلام آباد۔ 02ستمبر (اے پی پی) آزاد جموں و کشمیر نا صدر بیرسٹر سلطان محمود چوہدری حریت کانفرنس نابزرگ راہشون سید علی گیلانی نا کزیت آ است ہسونی نا درشانی ءِ کرینے۔ اوپارے کہ سید علی گیلانی نا کزیت نا بنگٹ است رنجیدہ و خنک خڑینکی ءُ، اونا کزیت تحریک آجوئی کشمیر کن بھلو نسخان اسے۔ پنچ شنبے نادے آ جاری تینا بیان اٹی اوپارے کہ سید علی گیلانی نا کزیت آن ودی مروک آ خورکی داسہ پیڑی تیان پورو مننگ کپک۔ اوناتحریک آجوئی کشمیر کن خذمت آک ننکن کسر نا ڈیواءُ۔ صدر پارے کہ سید علی گیلانی مچ آ زند بھارتی ظلم و جور انا مون آ سوگو آ خل آنبار سلیس و زمانہ نا سختیک اودے تینا مسخت نا کسر آن اسہ کنڈ کننگ کتوس۔ اونا پاننگ ئس کہ سید علی گیلانی جیرت و نرزوری و شجاعت نا زندہ ءُ درور اسے۔ او بندی نا ہرسختی ءِ سگا ولے آجوئی نا روشنائی ءِ وخت اس کہ کہینگ کن الیتو۔ صدر پارے کہ سید علی گیلانی کشمیری قوم انا حقی ہیرو ئس و مچ آ کشمیری قومءِ تینا دا راہشون آ نازءِ۔ سید علی گیلانی دنیاغان رخصت مس ولے اوننا است آتے ٹی زندہ سلک و نن اونا مشن ءِ برجا تخسا تحریک آجوئی کشمیر ءِ مون آ درسا کینہ۔ اونا پاننگ ئس کہ سید علی گیلانی نا مشن ہرحال اٹ برجاسلک۔
