اقوام متحدہ۔ 02ستمبر(اے پی پی) اقوام متحدہ ٹی پاکستان نا آخبتی مندوب منیر اکرم جموں و کشمیر نا آجوئی و وتواجہی نا جہد نا علمبردار و حریت راہشون سید علی گیلانی نا کزیت آ است ہسونی نا درشانی ءِ کرینے و اومیت ظاہر کرینے کہ جموں و کشمیر نا آجوئی و وتواجہی نا دوئی کننگ نا جہد پوسکن آ جوش و عزم اتون برجاسلک۔ اوتدوک آدے تینا ہڑزخواہی کلہو اٹی پارے کہ حریت راہشون سید علی گیلانی کشمیرنا آجوئی و تواجہی نا جہد کن تینا درور تینٹ ءِ،اونا مرک بھلونسخان اسے، ہراڑآ ای و اقوام متحدہ ٹی پاکستانی مشن جموں و کشمیر و پاکستانی الس تون داغم اٹی بریبر ناشریک اُن۔ اوپارے کہ ننا دعاک حریت راہشون نا خاہوت تون ءُ۔ اوآل پارٹیز حریت کانفرنس و کشمیری الس تون ہڑزخواہی نا درشانی ءِ کرسا پارے کہ سید علی گیلانی کشمیرنا جہد آجوئی ٹی بھارت نا وحشیانہ جور انا برخلافاسہ سوگو ءُ دیوال اسے آنبار سلیس و کشمیری تا حق خودارادیت کن پدریسہ جنگ ترساکرے۔ اوپارے کہ اونا اصولی و اخلاقی موقف جموں و کشمیر نا غیرکانودی بھارتی کوزہ نا برخلاف پیدوار ئس۔ پاکستانی مندوب منیراکرم پارے کہ حریت راہشون سیدعلی گیلانی پاکستان ناوجود و رکھ انادفاع سوگو کروک آتیان اسٹ ئس واونامننگ ئس کہ جموں و کشمیر پاکستان نا بشخ ءِ و آجوئی کن سنبرینگوک جہد آن دے انا دے اس کشمیر پاکستان نا بشخ جوڑمریک۔
