اسلام آباد۔ 02ستمبر (اے پی پی) بنجائی وزیر مواصلات مراد سعید پارینے کہ ساڑی حکومت نا مسہ سال اٹی 1753کلومیٹر سڑک تفنگانے، ریونیوٹی 119درسد نا ودکی مسنے، سکھر، حیدر آباد موٹروے، دیرموٹروے کھاریاں راولپنڈی موٹروے نا ڈٹ آتیا کاریم ہم ہنداسال بناکیک، نجی بشخ انا شریداری اٹ شاہراہ و سڑک جوڑ کننگ اُن، داڑآن زرکاری ٹی ودکی تون اوار اوار قوم انا پیسہ ہم بچک۔ او پنچ شنبے نا دے آ داڑے سیالکوٹ۔ کھاریاں موٹروے نا بنداو ءِ تخنگ نا دود آن تران کریکہ۔ مراد سعید پارے کہ داموٹروے نا تفنگ آن سفر100کلومیٹر کم مریک، ساڑی حکومت احساس پروگرام، الس ءِ مفت درمان نا فراوانی وخارجہ پالیسی ءِ گچین جوڑ کننگ آ چکارکننگ ءِ، زرکاری ٹی ودکی کننگ انگ ءِ و قوم انا پیسہ ءِ بچت کننگ انگ ءِ۔ مسکوہی حکومت نا اولیکو مسہ سال اٹی 645کلومیٹر و ننا مسہ سال اٹی 1753کلومیٹر سڑک جوڑ کننگانے، اکتوبر اسکان دافتے ٹی 700کلومیٹر پین ودکی مریک، نن مسہ سال اٹی 6118کلومیٹر سڑک آتا ڈٹ بندی کرینن وخت اس کہ مسکوہی حکومت نا دور اٹ داوخت اٹی 858کلومیٹر سڑک آتا ڈٹ بندی کننگاسس، شاہراہ تا 12بھلاڈٹ آتیا کاریم زوت بناکیک، سڑک آتون اوار اوار ریونیو ہم ودنگ ءِ و 87ارب روپئی نا ودکی مسنے، ای پروکیورمنٹ آن پد ای بڈنگ نا ہم بناءِ کننگانے۔ اوپارے کہ 300کلومیٹر مرغن سکھر حیدر آباد موٹروے 200ارب روپئی ناخڑچ آن بناکیک، کھاریاں راولپنڈی موٹروے آکاریم ہم ہنداسال بناکیک، داکان بیدس سوات موٹروے نا ارٹ میکو ریسہ نا ٹینڈر جاری مسنے، دیر موٹروے ڈٹ آہم ہنداسال کاریم بناکیک، پشاور ڈی آئی خان موٹروے ڈٹ انا فزیبلٹی جوڑ مسنے، خضدار بسیمہ، لودھراں ملتان، چترال شندور، کوئٹہ بائی پاس و ڈیرہ مراد جمالی بائی پاس ڈٹ آتے پورو کننگک، جی ٹی روڈ ءِ جوڑ جاڑکینہ۔
