پاکستان اوغان امن عمل اٹ ”کمکار“ ناتینا کڑدءِ برجاتخک، وزیرخارجہ مخدوم شاہ محمود قریشی نا شش می تھنک ٹینک فورم آن تران

اسلام آباد۔ 02ستمبر (اے پی پی) وزیرخارجہ مخدوم شاہ محمود قریشی پارینے کہ پاکستان اوغان امن عمل اٹ ”کمکار“ ناتینا کڑد ءِ برجاتخک ولے ننا کڑد ءِ ضامن نا وڑاٹ غلط وڑاٹ ہلنگپ، نن طالبان تا پڑوآتے مثبت و حوصلہ افزاتکنہ، اجتماعیت ناحامل نظام طالبان تیکن اہم ءِ۔ پنچ شنبے نادے آ داڑے شش می تھنک ٹینک فورم آن تران کرسا وزیرخارجہ پارے کہ تدوک آ اِرادہائی ٹی جہانی سیوت فوجی انداز فکر ءِ تیناکرسا اوغانستان اٹ امن نا دوئی کننگ نا کوشست کرے ہراکناخیال اٹ زمینی راستکی تیا مبنی الوکہ۔ دوہاامن معاہدہ اوغانستان نا سرکڑدہ غاتے کن اسہ پوسکن ءُ اومیت اس ایس، وخت اس کہ بدبختی اٹ بین الاوغان مذاکرات اٹ بھاز کم پیش رفت مس۔ بے یخینی نا حالیت آتے ٹی پین پیچیدگی 31اگست 2021ء آ فوج انا پیش تمنگ نا اناگت امریکی پڑوآن ودی مس۔ اوپارے کہ اوغان سیکورٹی فورس آتا کنڈآن مزاحمت نا کمتی و طالبان تا کابل نا ترندی اٹ ٹیک اوور جہانی برادری ءِ حیران کرے۔ ایہن تو خانہ جنگی نا گمان چٹانے۔ وزیرخارجہ پارے کہ ٹیک اوورآن پد آن طالبانک عامی معافی، زالبول آتا حق انا رکھ، سلاہ درشانی نا آجوئی، روزگار و تعلیم نا فراوانی و اجتماعیت ناحامل سیاسی نظام کن کشادگی نا چندی پڑوآتے کرینو۔ طالبانک آخبت نا سیاسی نظام نا بابت اوغان راہشون آتون گپ وتران کننگ ءُ۔ وزیرخارجہ پارے کہ پاکستان اسٹ انگا ملک ئس ہرامدام ہنداپارے کہ اوغان جھیڑہ نا ہچ ءُ فوجی ایسر اس اف۔ اوپارے کہ جانی نسخان و زرگزران ہڑتوم آلحاظ اٹ اوغانستان آن پد غٹ آن زیات نن زہمی مسونن۔ اوغانستان اٹی امن و سوگوی ٹی پاکستان آن زیات پین ملک اسے نا فائدہ اف۔ وزیرخارجہ پارے کہ ساڑی حالیت آتے ٹی نن اوغانستان اٹی اجتماعیت نا حامل نظام کن مخ تفی ءِ برجاتخانن انتئے کہ ہندا مون آ ہِننگ نا اسٹ انگا گچین کسر ءِ۔ نن طالبان تا پڑوآتے مثبت و حوصلہ افزاتکنہ۔ اوغان سرکڑدہ غاک اوغان الس نا خواست آتے پورو کننگ، اختلاف آتے مفاہمت اٹ شاغنگ و مذاکرات نا کمک اٹ سیاسی تصفیہ نا دوئی کننگ نا دیرینہ ہدف نا زمواری ءِ امنا کیر۔ داڑآن علاقائی و جہانی کہول آکمکاری نا پوسکن ءُ گمان ودی مریک۔ جیواکنامکس آ ننا اول سرآن تخوک آ چکار نا رداٹ نن محسوس کینہ کہ ’ڈیہہ‘ نا گنڈنگ نا بھرمک ہمووخت اسکان پورو مننگ کپسہ ہراتم اسکان اوغانستان اٹی پائیدار امن مفک۔ نن سمجھنہ کہ داوخت آ غٹ آن بھلا موقع اوغانستان اٹی پائیدار امن و سوگوی کن یکجامننگ نا دروشم اٹی ساڑی ءِ۔