چیئرمین سینیٹ صادق سنجرانی شجرکاری مہم نا رداٹ پارلیمنٹ لاجز اٹی نیال اس خلک

اسلام آباد۔ 02ستمبر (اے پی پی) چیئرمین سینیٹ صادق سنجرانی وزیراعظم نا پلانٹ فار پاکستان شجرکاری مہم نا رداٹ پنچ شنبے نادے آ پارلیمنٹ لاجز اٹی نیال اس خلک۔ سینیٹ سیکرٹریٹ آن جاری بیان نا رداٹ داوخت آ چیئرمین سینیٹ پارے کہ پاکستان ءِ موسمیاتی بدلی نادروشم اٹ بھاز بھلو چیلنج مون تروک ءِ، زیات درخت خلسا ہی نن موسمیاتی بدلی نا اثرآتے کم کننگ کینہ۔ اوپارے کہ چاگڑد دوست گام گیج ننا اولیت آتے ٹی بایدے اوار مرے، چاگڑد دوست رویہ غاتا مون آ دننگ کن غٹ ادارہ غاتے اواری اٹ کاریم کننگ نا گرج ءِ، موسمیاتی بدلی نا اثرآتے پبی شجرکاری و چاگڑد دوست گام گیج آتیان ہی کم کننگ مریک۔ چیئرمین سینیٹ پارے کہ الس وزیراعظم عمران خان نا کلین اینڈ گرین پاکستان مہم اٹی بشخ ہلسا درخت خلے و چاگڑد دوست رویہ ءِ تینا کے۔ اوپارے کہ موسمیاتی بدلی تا اثرآتے کم کننگ کن گچین کانود جوڑ کننگ کن کوشست کننگ انگ ءِ، کاربن نا پیشن مننگ ءِ کم کننگ کن پارلیمنٹ ہاؤس شمسی توانائی آن بجلی نا گرج آتے پورو کننگ ءِ۔ چیئرمین سینیٹ پارے کہ اسہ کساس اسے نا رداٹ داوخت آ پاکستان نا بیرہ 5.7درسد رقبہ جنگل آتیاٹی ءِ ہرا بھاز گڑتی نا ہیت اسے، درخت خلنگ آن نئے بیرہ ننا چاگڑد زیبامریک بلکن درخت آکسیجن نا اہم ذریعہ ہم ارے۔ صادق سنجرانی پارے کہ تعلیمی و راجی حلقہ غاتون اوار قومی شجرکاری مہم اٹ انفرادی وڑاٹ ہراسٹ بشخ ہلے تانکہ پاکستان ءِ سرسوز و شاداب جوڑ کننگ مرے۔ یات سلے کہ وزیراعظم عمران خان 2ستمبر 2018ء آ 10بلین ٹری سونامی مہم نا بناءِ کرے۔ پلانٹ فار پاکستان پنچ سال انا ڈٹ اٹی 2023اسکان 10بلین درخت خلنگ نا ہدف ءِ۔