اوغانستان اٹی امن پاکستان و سی پیک کن خوش آئند مریک، وزیر ڈٹ بندی و شونداری، اصلاحات و خصوصی گام گیج اسد عمر نا انٹرویو

اسلام آباد۔ 02ستمبر (اے پی پی) وزیر ڈٹ بندی و شونداری، اصلاحات و خصوصی گام گیج اسد عمر نا پاننگ ءِ کہ اوغانستان اٹی امن پاکستان و سی پیک کن خوش آئند مریک ہراڑآن نیامی ایشیااسکان رسینگ دوئی مریک، ننا کوشست ءِ کہ کورونا ویکسین پاکستان اٹی ہی جوڑ کین تانکہ پاکستانی زرگزران آ زیات بھاریم تمپ۔ داخیال آتا درشانی ءِ او پنچ شنبے نادے آ اسہ انٹرویو اسے ٹی کرے۔ بنجائی وزیر ڈٹ بندی و شونداری اسدعمر پارینے کہ اوغانستان تون اوار سی پیک اٹ شریداری و زرکاری نا است خواہ غٹ ملک آتے پاکستان و چین نا کنڈآن بخیر اٹ پاننگک۔ سی پیک نا معاملہ غا بنجائی وزیر پارے اگہ اوغانستان اٹی امن بریک تو دا مچ آ پٹی ملنگک و داکان پاکستان اٹ سی پیک نا بیس ءِ ہلسا اوغانستان ناکمک اٹ نیامی ایشیااسکان سرکننگ مریک۔ اوپارے کہ سی پیک نا ڈٹ آتے ٹی پی ٹی آئی نا حکومت اٹ پین گیشتر مسنے۔ نیشنل کمانڈ اینڈ آپریشن سینٹر(این سی او سی) نا بارواٹ اوپارے کہ کورونا دین آ کنٹرول کن ریاست نا غٹ تمبہ غاک اواری اٹ کاریم کریر۔ این سی او سی ٹی سول و ملٹری کمامدارآک تو اوار ئسر ہی ولے کورونا نا بابت ہرانن فیصلہ غاتے کرین اوفتے ٹی بھاز بھلو کمک اس عدالتی نظام ہم کرے۔ پڈپُر زالبول آتے کورونا ویکسین خلنگ نا بابت سوج انا ورندی ٹی بنجائی وزیر پارے کہ بناٹی گائیڈلائنز ئس کہ ویکسین خلفنگپ ولے داسہ دا گائیڈ لائنز ءِ بدل کننگانے۔ اسد عمر پارے کہ پڈپُر و ایلو مخلوق اٹ ویکسین آن مروک آ مضراثرآک اسہ ہی وڑ ءُ بلکن اسہ دیکی ملک اسے نا ریسرچ نا حوالہ ءِ ترسا اوپارے کہ پڈپُر آ زالبول آتے کن ویکسین خلفنگ زیات المی ءِ۔