وزیرخارجہ تون آسٹریا نا ہم منصب الیگزینڈر شیلنبرگ نا ٹیل فون آ رابطہ، زرکاری، بڑزکو تعلیم، سیل و سوات و کلچرنا بشخ آتے ٹی ہڑتوم آ کنڈآتا کمکاری ءِ ودفنگ آ امنا

اسلام آباد۔ 02ستمبر (اے پی پی) وزیرخارجہ مخدوم شاہ محمود قریشی تون اوناآسٹریانا ہم منصب الیگزینڈر شیلنبرگ پنچ شنبے نادے آ ٹیل فون رابطہ کرے۔ ہڑتوم آ وزیر خارجہ غاک پاکستان و آسٹریا نا نیام اٹ واپار، زرکاری، بڑزکو تعلیم، سیل و سوات و کلچر نا بشخ آتے ٹی ہڑتوم آ کنڈآتا کمکاری ءِ ودفنگ آ امنا کریر۔ دفترخارجہ نا رداٹ ہڑتوم آ وزیرخارجہ غاتا نیام اٹ ہڑتوم آ کنڈآتا تعلقداری، اوغانستان نا ساڑی حالیت آتون اوار تین پہ تینی است خواہی نا باندات آ گپ وتران مس۔ وزیرخارجہ مخدوم شاہ محمود قریشی آسٹریا نا وزیرخارجہ ءِ اوغانستان نا حالیت آتا بابت پاکستان نا نقطہ نظرآن معلومدار کرے و پارے کہ پاکستان، اوغانستان اٹی اجتماعیت نا حامل سیاسی تصفیہ نا مخ تف ءِ۔ شاہ محمود قریشی پارے کہ نن غٹ اوغان رڑتے جامع سیاسی تصفیہ کن سنجیدہ کوشست آتے کاریم اٹ اتنگ ناترغیب تننگ اُن۔ ساڑی حالیت آتے ٹی اوغان شاری تا سیکورٹی و اوفتا حق انا رکھ ءِ پک کننگ نا گرج ءِ۔ اوپارے کہ اوغانستان اٹی تدوک آ چِل سال آن برجاجنگ و جدل نا چٹفنگ کن دااسہ تاریخی ءُ موقع اسے۔ اوغانستان نا سوگوی کن جہانی برادری نا کنڈآن یکجہتی نا درشانی، داامن کوشست آتے ایسر اسکان سرکننگ اٹ کمکار جوڑ مننگ کیک۔ آسٹریا نا وزیر خارجہ کابل آن آسٹرین شاری تا پیش تمنگ اٹ، پاکستان نا کنڈآن تروک آ کمکاری آ وزیرخارجہ مخدوم شاہ محمود قریشی و پاکستانی سرکڑدہ غاتا منت واری ءِ ہرفے۔ وزیرخارجہ مخدوم شاہ محمود قریشی پاکستان نا کنڈآن پیش تمنگ نا عمل اٹ کمکاری ءِ برجاتخنگ نا عزم انا درشانی ءِ کرے وپارے کہ اوغانستان اٹی سیکورٹی ناحالیت آتے مست آنبار اتنگ، اوغان مہاجرآتا بننگ آن بچنگ و خانہ جنگی نا گڑتی تے مر کننگ کن غٹ ءِ اسیجائی کوشست آتے کاریم اٹ اتوئی مریک۔ ہڑتوم آ وزیرخارجہ غاک پاکستان و آسٹریا نا نیام اٹ ہڑتوم آ کنڈآتا تعلقداری تا ساڑی آ وڑآ است جمی نا درشانی ءِ کرسا اوفتے پین سوگو کننگ نا عزم انا درشانی ءِ کریر۔