اسلام آباد۔ 02ستمبر (اے پی پی) وزیراعظم عمران خان پارینے کہ ملکی کٹیاءِ ودفنگ آن بیدس وام تے چٹفنگ کپنہ، سیل و سوات و صنعت آتا مون آ دننگ آ خاص چکار کننگ اُن، کاروبار اٹ آسانی ودی کننگ ننا اولیت ءِ، پبلک پرائیویٹ پارٹنر شپ آن شونداری فنڈ بچت مریک، پبلک پرائیویٹ پارٹنر شپ انا کسر اٹ بروک آ اڑاند آتے مرکننگک، مسکوہی دورتے ٹی جوڑ مروک آ موٹروے تا ملک ءِ زیات فائدہ متو، ہرڈٹ انا بناءِ کننگ نا وخت آ ملکی فائدہ غاتے بایدے مون آ تخنگے، مسکوہی دورآن داتم اسکان مسہ ہنداخہ پین سڑک جوڑ کرینن، داسہ سڑک آتا کمیشن آن لندن اٹ فلیٹ ہلنگ پننگک، سیالکوٹ۔کھاریاں موٹروے آن سفرنا وخت و پاس کم مننگ تون اوار اوار صنعتی سرجزآتے ہم مون آ دننگک۔ اوداخیال آتا درشانی ءِ پنچ شنبے نادے آ داڑے سیالکوٹ۔کھاریاں موٹروے نا بنداو ءِ تخنگ نا دود آن کرے۔ بنجائی وزیر حوالکاری و شینکاری چوہدری فواد حسین و بنجائی وزیر مواصلات مراد سعید ئسک ہم دود اٹی ساڑی ئسر۔ وزیراعظم پارے کہ پبلک پرائیویٹ پارٹنر شپ انا رداٹ ڈٹ آتا بنااسہ پوسکن ءُ سوچ اسے، شونداری فنڈاسکول، ہسپتال و ایلو ڈٹ آتیا خڑچ کننگک ولے فنڈ کچ اٹ مننگ نا سوب آن شونداری ہم کچ اٹ مریک۔ اوپارے کہ سیالکوٹ۔کھاریاں موٹروے بھاز اہم ءُ ڈٹ اسے انتئے کہ داعلاقہ ٹی صنعتی سرجزآتا مون آ دننگ نا بھاز گنجائشت ءِ، گوجرانوالہ، گجرات، وزیرآباد و سیالکوٹ اٹ صنعت آتے مون آ دننگ مریک، صنعتی سرجزآتیان کٹیاٹی ودکی کننگ مریک، ہراتم اسکان کٹیا ٹی ودکی مفک وام تے چٹفنگ کپنہ، صنعتی سرجزآتا مون آ دننگ کن آسراتی تننگے۔ وزیراعظم پارے کہ زیات آبادی نا سوب آن داعلاقہ نا اہمیت زیات ءِ و داموٹروے صنعتی علاقہ غاتیان گدرینگک۔ پبلک پرائیویٹ پارٹنر شپ انا کسر اٹ بروک آ اڑاند آتے مرکینہ، ساڑی حکومت کاروبار اٹ آسانی ودی کننگ آ زور شاغنگ ءِ، چنکاونیامی درجہ نا کاروبار زرگزران اٹ تمبہ نا حیثیت تخک، داٹی ہم اڑاند آتے مرکننگ اُن، اڑاند آتا سوب آن اوفتے مون آ دننگ مفک۔ اوپارے کہ سیالکوٹ۔کھاریاں موٹروے نا تفنگ آن سفر 100کلومیٹر کم مریک، داڑآن ودکی ایندھن و گاڈی تا جوڑ جاڑ نا مد اٹ خڑچ مروک آ زرہم بچک انتئے کہ نن پٹرولیم مصنوعات درآمد کینہ و اوڑآ نہادی زرمبادلہ خڑچ مریک۔ وزیراعظم پارے کہ موٹروے آ ٹریفک نا زور زیات مریک، مستین اٹ ہراموٹروے تے جوڑ کننگا اوفتا ملک ءِ زیات فائدہ متو، داڑے موٹروے بایدے مہالو جوڑ مروسس، ایلوکنڈآ سڑک ءِ اِرارویہ ہم کننگ مسکہ، داچرجوئی ٹی مروک آ داتم اسکان نا نسخان تا کساس ءِ ہم خلنگے، اِراسال اٹ سیالکوٹ۔کھاریاں موٹروے پورو مریک، دااسہ فعال ءُ ڈٹ اسے، داڑآن پیسہ ہم بچک و داعلاقہ شون ہلیک و صنعت آتے ہم موٹروے تون گنڈنگک۔ وزیراعظم پارے کہ پبلک پرائیویٹ پارٹنر شپ آن شونداری فنڈ بچک و سرکاری شونداری فنڈ آتے ایلو شونداری ڈٹ آتے کن کاریم اٹ اتنگ مریک۔ اوپارے کہ مسابقتی بولی نا نظام نابناءِ کننگ نا سوب آن 26درسد قومی خزانہ ءِ بچت مسنے، داہم اسہ بھلو گچین ءُ گام اسے، ہراہم ڈٹ ءِ خلنگے اونا بارواٹ اول سجفنگے کہ داڑآن ملک ءِ اخس فائدہ مریک۔ وزیراعظم پارے کہ خیبرپختونخوا ٹی سوات موٹروے نا ڈٹ بھاز سرسہب مس و داڑآ ننا حکومت ءِ گمرءِ، عئید انا چھٹی تیٹی سیل و سوات کن ہنوک آتا کچ ودنگ نا سوب آن 27لکھ گاڈی داموٹروے اٹ سفرکریر، داڑآن زرگزرانی کٹیاہم ودانے، ننا ملک انا 22 کروڑ آبادی ءِ، دادے نن تینا فائدہ کن ہم کاریم اٹ اتنگ کینہ و داآبادی ءِ بایدے بھاریم اس جوڑ مف، سرکاری و نجی شریداری نا رداٹ سڑک آتا تفنگ کن زرکاری ہمووخت آ بریک ہراتم ٹریفک نا زور زیات مرے۔ وزیراعظم پبلک پرائیویٹ پارٹنر شپ نا رداٹ سیالکوٹ۔کھاریاں موٹروے ڈٹ انابناءِ کننگ آ بنجائی وزیر مواصلات مراد سعید و این ایچ اے نا کمامدارآتے خراج تحسین پیش کرے۔
