اسلام آباد۔ 02ستمبر (اے پی پی) وزیراعظم عمران خان پارینے کہ حکومت صنعتی شونداری کن ملکی و درملکی زرکارآتا کسر اٹ بروک آ اڑاند آتے چٹفنگ ءِ، زرکارآتے کن ہروڑاٹ آسانی ودی کننگ حکومت نا اولیت ءِ۔ داخیال آتا درشانی ءِ او پنچ شنبے نادے آ اسپیشل اکنامک زون تیٹی ہندی و درملکی زرکارآتا آسانی کن ون ونڈو سروسز پورٹل ناجوڑ مننگ اٹ عملی پیش رفت نا بابت دیوان آن تران کرسا کرے۔ دیوان اٹی ون ونڈو سروسز نا جوڑ کننگ کن حکمت عملی نابارواٹ پاننگا۔ دیوان اٹی تعلقدار بڑزکو کمامدارآک ہم ساڑی ئسر۔ دیوان ءِ پاننگاکہ زرکاری بورڈ انا رداٹ ون ونڈو سروسز پورٹل نا جوڑ کننگ زرکارآتے مون تروک مشکل آتے مر کننگ کن کننگ انگ ءِ، پورٹل نئے بیرہ انتظامی و کانودی منظوری تا دوئی کننگ بلکن صنعت آتے آسراتی فراوان کننگ اٹ ہم کمک کیک۔ داڑکن تعلقدار محکمہ غاتے اِراریسہ غاتے ٹی پورٹل اٹ اوار کننگ انگ ءِ، پورٹل اٹ کاغدی کارروائی و ڈیجیٹل منظوری اوارءِ۔ مستی پاننگاکہ پورٹل اٹ نئے بیرہ بنجائی محکمہ غاک بلکن صوبائی محکمہ غاتے ہم اوار کننگ انگ ءِ۔ داوخت آ وزیراعظم عمران خان پارے کہ حکومت صنعتی شونداری کن ملکی و درملکی زرکارآتا کسر اٹ بروک آ اڑاند آتے چٹفنگ ءِ، زرکارآتے کن ہروڑنا آسانی ودی کننگ حکومت نا اولیت ءِ۔ اوپارے کہ پورٹل نا بابت غٹ اسٹیک ہولڈر آتون سلابت و سوگو کوآرڈینیشن ءِ پک کننگے، پورٹل نا جوڑ کننگ و فعالی ءِ تخوک آ وخت اٹ پک کننگے۔
