اسلام آباد۔ 01ستمبر (اے پی پی) وزیراعظم عمران خان پارینے کہ مست انا حکومت آک تعلیم نا مون آ دننگ کن تینا زمواری تے پورو کتوس، مخلوق ءِ تعلیم نا کمک اٹ مون آ ہِننگ نا موقع تفننگ ظلم و ناانصافی اسے، مسن تا تعلیم ءِ اہمیت تفرسا ملک انا نہادی میرات ءِ زیان کرسا کننگانے، اسکول اُراتیان مرمرے و استاد آتا کمتی مرے تو ویل ودی مریک، ساڑی حکومت نا کوشست ءِ کہ غریب انگا اُراتا چناتے تعلیم نا آسراتی فراوان کے، پوسکن آ ٹیکنالوجی نا کاریم اٹ اتنگ آن اسکول وظیفہ پروگرام ءِ شفاف کننگ و گچین چاروکی ٹی کمک رسینگک۔ اوداخیال آتا درشانی ءِ چارشنبے نادے آ داڑے احساس پروگرام نا رداٹ حقدار اُراتے کن اسکول وظیفہ غاتا جاری کننگ نا دود آن تران کرسا کرے۔ دود اٹی بنجائی وزیر تعلیم و کسبی تربیت شفقت محمود و وزیراعظم نا خصوصی کمکار راجی آسراتی و تخفیف نیزگاری ڈاکٹر ژثانیہ نشتر ئسک ہم ساڑی ئسر۔ وزیراعظم پارے کہ حقدار اُراتے کن اسکول وظیفہ غاتا جاری کننگ بھاز اہمیت تخک، داپروگرام نا اِرااہم ءُ پلو ءُ، پاکستان اٹ اِراکروڑ چنااسکول آ ہِنپننگ ءُ، اسٹ تو اوفتے اسکول آتے ٹی داخل کرفنگ و تعلیم نا زیور آن شپ کننگ ءِ، بدبختی اٹ دادے مہالو اہمیت تننگتو، ہنداسوب ءِ کہ چناتاداخہ دربھلو کچ اس اسکول آتیا ہِنپننگ ءُ، ملک انا غٹ آن بھلا سرمایہ اونا الس مریک و ہراتم نن تینا مخلوق ءِ تعلیم تفنہ تو نئے بیرہ داسرمایہءِ زیان کینہ بلکن اوفتیا داظلم و ناانصافی ءِ ہم کینہ کہ اوفتے شونداری نا موقع رسینگپک۔ وزیراعظم پارے کہ تعلیم نا مون آ سدننگ کن وظیفہ و آسراتی تننگ اُن، چناک زیات اسکول آتیان پیشن ءُ و خاص کر مسن تا تعلیم ءِ مست اٹ اہمیت تننگتو، مسن تا تعلیم ءِ اہمیت تفرسا ملک انا نہادی میرات ءِ زیان کرسا کننگا، خوانوک آ زالبول نرینہ غان زیات راج ءِ فائدہ تننگ کیک و خوانوک آ لمہ چناتا ولفنگ، تربیت وخیالداری ءِ زیات جوان کیک، مسن تا تعلیم نا دوئی کننگ کن حوصلہ افزائی ءِ کننگے، پرائمری کلاس آتا مسن تے 2000روپئی و چناتے 1500روپئی سہ ماہی وظیفہ تننگک۔ حکومت نا پورو کوشست ءِ کہ غریب انگا اُراتا چناتے تعلیم نا آسراتی فراوان کے۔ اوپارے کہ دااسکیم آن تعلیم کن مارو مسن تا است بڈی مریک، دیکی ٹی داتاثر ءِ شاید نن تینا مسن تے تعلیم ترفنگ خواپنہ حالانکہ دُن اف و ہرپاکستانی تینا مسن تے تعلیم نا زیورآن شپ کننگ نا خواہندار ءِ ولے گڑاس ہند آتیا اسکول آک مرمریرہ و ٹیچرہم مفک ہرانا سوب آن ویل ودی مریک، میانوالی نا تحصیل عیسیٰ خیل نا گڑاس علاقہ غاتے ٹی ہنداوڑ حالیت مسنے۔ وزیراعظم پارے کہ مست انا حکومت آتا زمواری ئس کہ او تعلیم کن آسراتی فراوان کروسر ولے اوفک تینا زمواری ءِ پورو کتوس۔ اوپارے کہ ننا حکومت تعلیم نا آسراتی تے ودفنگ و چناتا داخلہ غاتا کچ اٹ ودکی کن کوشست کننگ ءِ، انفارمیشن ٹیکنالوجی نا کاریم اٹ اتنگ آن داپروگرام ءِ شفاف جوڑ کننگ اٹ کمک رسینگک و داڑآن جعلی انٹریز و گھوسٹ اسکول کون آ ویل آتا مون ءِ توننگ مریک و گچین چاروکی ہم کننگ مریک۔ اواسکیم نا بناءِ کننگ آ ڈاکٹر ثانیہ نشتر و احساس ٹیم انا کارکڑد انا ستاءِ کرے۔
