اسلام آباد۔ 01ستمبر (اے پی پی) بنجائی وزیر خزانہ ومحصولات شوکت ترین جنرل سیلز خراج ءِ ہم گرنچ کننگ اٹ بنجا و صوبائی حکومت آتا نیام اٹ گیشتر کمکاری نا گرج آزور شاغانے۔ اوداہیت ءِ چارشنبے نادے آ داڑے نیشنل خراج کونسل (این ٹی سی) نا اولیکو دیوان نا کماشی ءِ کرساپارے۔ دیوان اٹی پنجاب نا وزیر خزانہ مخدوم ہاشم جوان بخت، پختونخوانا وزیر خزانہ تیمورخان جھگڑا، بلوچستان نا وزیر خزانہ، سیکرٹری خزانہ سندھ، چیئرمین سندھ بورڈ آف ریونیو، بنجائی سیکرٹری خزانہ، چیئرمین ایف بی آر و ایلو سینئر کمامدارآک ساڑی ئسر۔وزیر خزانہ بشخ ہلوک آتا منت واری ءِ ہرفے و جنرل سیلز خراج ءِ ہم گرنچ کننگ اٹ بنجا و صوبائی حکومت آتا نیام اٹ گیشتر کمکاری نا گرج آ زور شاغا۔ اودااومیت نا درشانی ءِ کرے کہ نیشنل خراج کونسل نا چھتری نا کیرغ آن بنجا و صوبائی حکومت آک کاروباری خڑچءِ کم کننگ و کاروباری تے آسراتی فراوان کننگ کن چندی خراج آتے ہم گرنچ کننگ کن اواری اٹ کاریم کیرہ۔ سیکرٹری خزانہ محمد یوسف نیشنل خراج کونسل نا ٹرم آف ریفرنس ءِ مون آ تخا وداتم اسکان مروک آ پیش رفت نا بارواٹ معلومدار کرے۔ دیوان اٹی فیڈرل بورڈ آف ریونیو و صوبائی وزارت ہائے خزانہ خراج آتا بابت باندات آ مثبت و فائدہ ئی سلاہ تس۔ صوبائی وزیرخزانہ غاک بنجائی حکومت نا دا گام انا ستاءِ کریر، و ملک انا گچینی و زرگزران اٹ پیش رفت کن این ٹی سی نا چھتری ناکیرغ آن کاریم کننگ و و مون آ ہِننگ کن ہروڑاٹ کمکاری نا باوری کرفے۔ بنجائی وزیر خزانہ خراج آتا بابت پدسلوک آ باندات آتے طے کننگ کن اواری اٹ کاریم کننگ نا گرج آ زور شاغا تانکہ بنجا و صوبہ غاتا نیام اٹ جنرل سیلز خراج ءِ زوت آن زوت گڈیکو دروشم اس تننگ مرے۔
