اسلام آباد۔ 01ستمبر (اے پی پی) وزیراعظم نا خصوصی کمکار موسمیاتی بدلی ملک امین اسلم پارینے کہ وزیراعظم عمران خان و اونا کلین گرین پروگرام دنیا ٹی پاکستان نا پہچان جوڑ مسنے، پاکستان نا مہمانداری ٹی جہانی یوم ماحولیات 2021ء نا سرسہبی ءِ جہانی کہول آ زبردست است بڈی رسینگانے، ننا سرسہب گرین سفارتکاری نا سوب آن سعودی عرب و امریکہ تون چاگڑد نا بشخ اٹی تعلقداری پوسکن اول سرآن مسنے، ٹین بلین ٹری سونامی و اوڑتون گنڈوک ایلو گرین ڈٹ آتا نئے بیرہ جہانی کہول آ اعتراف ءِ کننگانے بلکن اوفتے ماڈل نا وڑاٹ تینائی ہم کننگ انگ ءِ، اپوزیشن ہم مون آ بروک آ پاکستان نا نشانی داڈٹ انا مخالفت ءِ کننگ ناجاگہ غا مون آ برے و نیال خلسا تینا بشخ انا کڑد ءِ ادا کے۔ چارشنبے نادے آداڑے موسمیاتی بدلی و چاگڑد نا رکھ و بحالی نا بابت پاکستان تحریک انصاف نا حکومت نا ڈٹ و سرسہبی تا بارواٹ میڈیا ءِ حوال ترسا ملک امین اسلم پارے کہ وزیراعظم عمران خان نا ساف و سرسوز پاکستان ویژن نا رداٹ اول خیبرپختونخواٹی اسہ ارب درخت خلنگا وخت اس کہ داڑآن پنچ لکھ مخلوق ءِ روزگار ہم ملانے، دا ڈٹ انا سرسہبی آن پد مچ آ ملک اٹی بھلو کچ اسے آ شجرکاری کن ٹین بلین ٹری سونامی نا ڈٹ انا بناءِ کننگا۔ اوپارے کہ دا ڈٹ انا رداٹ ملک اٹی داسال انا ایسر اسکان یک ونیم ارب درخت خلنگ نا ہدف پورو مریک۔ ملک امین اسلم پارے کہ پاکستان تحریک انصاف نا حکومت قدرتی چاگڑد و جنگلی حیات نا رکھ اکن پروٹیکٹڈ ایریہ غاتا ڈٹ آتا ہم بناءِ کرے ہرانا رداٹ 15پوسکن آ نیشنل پارک جوڑ کننگا، داسہ ملک اٹی نیشنل پارک آتا کچ 30آن ودسا 45مسنے۔ اوپارے کہ حکومت سرسوز ڈٹ آتا مسخت بیرہ درخت خلنگ اف بلکن چاگڑد دوست روزگار نا وارخواہی ہم ودی کننگ ءِ۔ کوویڈ۔ 19اٹی دا ڈٹ آتے ٹی 85ہزار ملازمت فراوان کننگانے۔ اوپارے کہ جہانی بینک گرین سٹیمولس ڈٹ اکن فنڈ فراوان کرینے ہراڑآ اکتوبر آن کاریم بناکیک، وزیراعظم عمران خان اونا بناءِ کیک۔ داڈٹ آن اِرالکھ ملازمت نا وارخواہی ودی مریک۔ اوزیتون نا دسنگ، مینگرو وفاریسٹ، مگس بانی و الیکٹرک وہیکل آتا ڈٹ آتا بارواٹ ہم پارے۔ ملک امین اسلم پارے کہ وزیراعظم عمران خان نا کماشی و ٹین بلین ٹری سونامی پاکستان نا درستی راستی جوڑ مسنو۔ جہانی یوم ماحولیات 2021ء نا مہمانداری نا شرف دوئی مننگ دانا پیدوار شاہدی ءِ۔ اوپارے کہ اقوام متحدہ نا ادارہ ماحولیات نا سروک وزیراعظم عمران خان ءِ چٹھی ٹی پاکستان نا سرسہبی تے امنا کرینے۔
