اسلام آباد۔ 01ستمبر (اے پی پی) وزیراعظم نا خصوصی کمکار راجی آسراتی و تخفیف نیزگاری ڈاکٹر ثانیہ نشتر پارینے کہ ناخواندگی نیزگاری ٹی ودکی نا سوب ءِ، مسن تا تعلیم آ چکار کننگ نا گرج ءِ، ننا ملک اٹ اِراکروڑ چنااسکول آتیا ہِنپننگ ءُ، حقدار طالب علم آتے کن اسکول وظیفہ پروگرام آن تعلیم نا مون آدننگ ونیزگاری ٹی کمتی اتنگ اٹ کمک رسینگک، داپروگرام نا رداٹ اولیکو جماعت آن دُوانزدہ جماعت اسکان نا طالب علم آتے وظیفہ ملک، مسن تیکن وظیفہ نا زر مارتیان زیات مریک اوداخیال آتا درشانی ءِ چارشنبے نادے آ داڑے احساس پروگرام نا رداٹ حقدار اُراتیکن اسکول وظیفہ نا جاری کننگ نا دود آن تران کرسا کرے۔ اوپارے کہ اولیکو وار ملک گیر کہول آ حقدار خاہوت آتا چناتے وظیفہ تننگ نا اسکیم نا بناءِ کننگ انگ ءِ ودانا مسخت تعلیم اسکان رسینگ ءِ ودفنگ ءِ، داوخت آ احساس کفالت، احساس بے سود وام و احساس ایمرجنسی کیش کون آ اسکیم آتے چلیفنگ انگ ءِ، وزیراعظم نا پارت آ فوڈ ٹرک چلیفنگ انگ ءِ، لنگرخانہ و پناہ گاہ جوڑ کننگانے، احساس نشوونما اسکیم ودنگ ءِ و ون ونڈو سروس نا بناءِ کننگانے۔ اوپارے کہ احساس اسکول وظیفہ اسکیم آن ہمو چناک فائدہ ہرفرہ ہرافتا حاضری 70درسد مریک و سہ ماہی وظیفہ تننگک، کچی جماعت آن دُوانزدہ جماعت اسکان نا چار آن 22سال اسکان نا چناک وظیفہ ہلنگ کیرہ، داقومی پروگرام اسے ہراملک انا 160ضلع غاتے ٹی بناکننگانے و مسن تیکن وظیفہ مارتیان زیات تخنگانے، اولیکو جماعت آن پرائمری جماعت اسکان مسن تیکن وظیفہ 2ہزار روپئی، مارتیکن 1500روپئی، سیکنڈری کلاس آتے ٹی مسن تیکن وظیفہ 3ہزار روپئی، مارتیکن 2500روپئی وہائرسیکنڈری کلاس آتے ٹی مسن تیکن 4ہزار روپئی ومارتیکن 3500روپئی مریک۔ اوپارے کہ احساس پروگرام 27مارچ 2019آبناکننگاسس، کوویڈآن پدہم ترندی اٹ دانا انتظامی پنجر پورو مس، تعلیمی وظیفہ غاتا فراوانی نیزگاری نا چٹفنگ کن المی ءِ انتئے کہ ناخواندگی نا سوب آن نیزگاری ودک، داپروگرام سہی وڑاٹ مون آ ہنا، اڑاند پیش بتو و بجٹ نا ویل متو تو داڑآن نیزگاری ٹی کمتی بریک۔ اوپارے کہ احساس پروگرام نا رداٹ مچ آ ملک اٹی سروے پورو مسنے و اسہ کروڑ خاہوت احساس پروگرام نا چندی اسکیم تیان فائدہ ہرفرہ۔
