بنجائی حکومت بڑزکو تعلیم نا مون آ دننگ کن ہرممکن کمک فراوان کیک، وزیراعظم عمران خان نا دیوان آن تران

اسلام آباد۔ 31اگست (اے پی پی) وزیراعظم عمران خان پارینے کہ ورناتا لائخی تے تالان کننگ کن پوسکن آ علم اٹ بڑزکو تعلیم کلیدی حیثیت تخک، بنجائی حکومت بڑزکو تعلیم نا مون آ دننگ کن ہرممکن کمک فراوان کیک۔ داخیال آتا درشانی ءِ او سے شنبے نادے آ تینا کماشی ٹی ملک اٹی بڑزکو تعلیم نا مون آ دننگ نا بابت جاچ دیوان اٹی گپ وتران کرسا کرے۔ دیوان اٹی بنجائی وزیر اسدعمر، فواد حسین و شفقت محمود، خصوصی کمکار ڈاکٹر شہباز گل، چیئرمین وزیراعظم ٹاسک فورس سائنس و ٹیکنالوجی ڈاکٹر عطاء الرحمان، ڈپٹی چیئرمین ڈٹ بندی کمیشن و سینئر آفیسر آک ساڑی ئسر۔ دیوان ءِ سیالکوٹ انجینئرنگ یونیورسٹی نا جوڑ کننگ آ پیش رفت آن معلومدار کننگا۔ دیوان ءِ پاننگاکہ 16.69ارب روپئی مالیت نا ڈٹ اکن ایکنک منظوری تسنے۔ سیالکوٹ انجینئرنگ یونیورسٹی بنجا و حکومت پنجاب اسیجائی وڑاٹ جوڑ کیک، ہراڑکن نیمہ زر و ڈغار حکومت پنجاب مہیا کیک۔ دیوان ءِ معلومدار کننگاکہ ہشت، نہہ و دہ جماعت آتا نصاب اٹ سیرت النبی ﷺ نا تعلیمات آتے اوارکننگ انگ ءِ و داجماعت آتے کن پوسکن آ نصاب ءِ زوت جاری کننگک۔ وزیراعظم پارے کہ ورناتا لائخی تے تالان کننگ کن پوسکن آ علم اٹ بڑزکو تعلیم کلیدی حیثیت تخک ہنداخاطرآن حکومت دا پلو آ پبی چکار کننگ ءِ۔ اوپارے کہ بنجائی حکومت بڑزکو تعلیم نا مون آ دننگ کن ہرممکن کمک فراوان کیک۔