اسلام آباد۔31اگست (اے پی پی) پاکستان و جرمنی نا نیام اٹ ڈل آتا کہول آ مذاکرات سے شنبے نادے آ وزارت خارجہ ٹی مس۔ ہڑتوم آ ملک آک واپاری کچ و تین پہ تینی است خواہی نا کثیر الجہتی بشخ آتے ٹی ہڑتوم آ کنڈآتا کمکاری ءِ ودفنگ آ امنا کریر۔ پاکستانی ڈل انا کماشی ءِ وزیر خارجہ مخدوم شاہ محمود قریشی وخت اس کہ جرمن ڈل انا کماشی ءِ جرمن وزیر خارجہ ہائیکو ماس کریکہ۔ ہڑتوم آ وزیر خارجہ غاتا نیام اٹ ہڑتوم آ کنڈآتا تعلقداری، چندی بشخ آتے ٹی ہڑتوم آ کنڈآتا کمکاری ءِ مون آ دننگ و اوغانستان نا ساڑی حالیت آتیا سرجم گپ وتران مس، مذاکرات اٹی، سیکرٹری خارجہ سہیل محمود، اسپیشل سیکرٹری خارجہ رضا بشیر تارڑ، جرمنی ٹی پاکستان نا سفیر ڈاکٹر محمد فیصل و وزارت خارجہ نا سینئر آفیسر آک بشخ ہلکر۔ وزیرخارجہ پارے کہ 15اگست آ اوغانستان اٹی اناگت بدلی مون آ بس، ہرااوغانستان نا بابت غٹ کساس آتے غلط ثابت کرے، ولے ستاکڑزوک ہیت دادے کہ اوغانستان اٹی بدلی ٹی کشت وخون مس نئے داٹی اوغانستان خانہ جنگی نا گواچی مس۔ شاہ محمود قریشی پارے کہ طالبان سرکڑدہ غاتا کنڈآن جنگ انا چٹفنگ، انسانی حق انا پاسداری، اوغانستان نا گل زمین ءِ پین ملک اسے نا برخلاف کاریم اٹ اتپننگ و اجتماعیت ناحامل حکومت سازی نا بابت بیان آک است بڈی نا سوب ءُ۔ اوغانستان نا بابت پاکستان و جرمنی ہڑتوم آتا نقطہ نظراسٹ ءِ۔ اوپارے کہ نن پرامن و سوگو اوغانستان نا خواہندار اُن، ننے دانازرک وخت آ، امن مخالف واکدار(اسپائیلر)آتیا سخت نظر تخوئی مریک۔ شاہ محمود قریشی پارے کہ جہانی برادری ءِ مرے کہ او داوخت آ اوغانستان ءِ تنیا ہلپ و اوفتا زرگزرانی کمکاری ءِ برجاتخنگے۔ اوغانستان اٹی امن نا فائدہ مچ آ ڈیہہ ءِ مریک۔ اوغانستان ءِ انسانی المیہ غان بچفنگ کن جہانی برادری نا کمک المی و اوغان تتون یکجہتی نا درشانی نا گرج ءِ۔ شاہ محمود قریشی پارے کہ نن، چندی ملک آتا سفارتی عملہ، جہانی ادارہ غاتا کارندہ و میڈیا نا نمائندہ غاتے کابل آن پیش تمنگ اٹ کمک فراوان کننگ اُن۔ وزیرخارجہ جرمن ہم منصب ءِ اوغانستان نا بابت اسیجائی لائحہ عمل اس جوڑ کننگ کن کروک آ ساڑی آ چار ملکی دورہ نا سرجم آتیان معلومدار کرے و پارے کہ نن اوغانستان نا حالیت آتا رداٹ چیلنج آتون مون تننگ کن امنائی لائحہ عمل اس تیناکننگ کن کوشست کننگ اُن و اوغانستان اٹی اجتماعیت نا حامل حکومت نا جوڑ کننگ نا خواہندار اُن۔ پاک جرمن تعلقداری نا بابت شاہ محمود قریشی پارے کہ پاکستان، جرمنی تون ہڑتوم آ کنڈآتا تعلقداری تے خاص اہمیت ایتک، کنے خوشی ءِ کہ پاکستان و جرمنی نا نیام اٹ سرسہب ہڑتوم آ کنڈآتا سفارتی تعلقداری نا ہفتادسال پورو مننگ ءُ۔ ہڑتوم آ ملک آتا نیام اٹ بڑزکو کہولی رابطہ غاتا چرجوئی، ہڑتوم آ کنڈآتا تعلقداری نا سوگوی نا درشانی ءِ۔ ہڑتوم آ وزیر خارجہ غاک ڈیہہ نا حالیت آتا بابت ہڑتوم آ کنڈآتا سلابت ءِ برجاتخنگ آہم امنا کریر۔
