پاکستان جرمنی تون تعلقداری تے بھاز اہمیت ایتک، پاکستان اوغان جھیڑہ و نزوری نا سوب آن بھاز مشکل آتون مون تسنے، وزیرخارجہ شاہ محمود قریشی نا تینا جرمن ہم منصب ہائیکو ماس تون اوڑدہی ٹی گپ وتران

اسلام آباد۔31اگست (اے پی پی) وزیرخارجہ شاہ محمود قریشی پاک جرمن ودوک آ ہڑتوم آ کنڈآتا کمکاری آ است جمی نا درشانی ءِ کرسا پارینے کہ پاکستان جرمنی تون تینا تعلقداری تے بھا زا ہمیت ایتک۔ داہیت ءِ او تینا جرمن ہم منصب ہائیکو ماس تون گپ وتران کرسا پارے ہراسے شنبے نادے آ اوڑتون وزارت خارجہ ٹی اوڑدہی کرے۔ دفترخارجہ نا رداٹ اوڑدہی ٹی وزیرخارجہ غاک اوغانستان نا حالیت آتون اوار ہڑتوم آ کنڈآتا تعلقداری تا بابت باندات آ گپ وتران کریر۔ وزیرخارجہ جرمن ہم منصب ءِ اوغانستان اٹی حالیت آتا بابت پاکستان نا نکتہ نظرآن معلومدار کرے و پارے کہ خڑک انا ہمسایہ مننگ نا ناطہ پاکستان اوغان جھیڑہ و نزوری نا سوب آن تدوک آ 40سال آن بھاز مشکل آتون مون تسنے۔ اوپارے کہ اوغانستان اٹی امن و سوگوی بھاز اہمیت تخک۔ داچرجوئی ٹی اوغان الس نا رکھ و سلامتی و اجتماعیت نا حامل سیاسی تصفیہ بھا زاہم ءِ۔ وزیرخارجہ داہیت آ زور شاغا کہ جہانی برادری ءِ مثبت کلہو و تعمیری سرجزآتا کمک اٹ رابطہ تخنگ نا گرج ءِ۔ داچرجوئی ٹی اوغانستان اٹی ہیومنیٹرین گرج و پائیدار اقتصادی سوگوی ءِ پک کننگ نا گرج ءِ۔ اوپارے کہ سیکورٹی حالیت آتے سوگو کننگ، امن ءِ برقرار تخنگ و بھلو کچ اسے آ پناہ گزین تے توننگ کن گام گیج کننگ المی ءِ۔ اوغانستان تون مثبت رابطہ غاتیان دااسیجائی ہدف آتا پیش رفت اٹ کمک رسینگک۔ وزیرخارجہ تینا جرمن ہم منصب ءِ ساڑی ہی ٹی اوغانستان نا ہمسایہ ملک آتا دورہ و اوفتا سرکڑدہ و وزیرخارجہ غاتون رابطہ غاتیان معلومدار کرے۔ شاہ محمود قریشی پارے کہ نن چندی ملک آتا سفارتی عملہ، جہانی ادارہ غاتا کارندہ و میڈیا نا نمائندہ غاتے کابل آن پیش تمنگ اٹ کمک فراوان کننگ ءِ۔