کوئٹہ۔ 31اگست (اے پی پی) وزیراعلیٰ بلوچستان جام کمال خان نا کماشی ٹی اڈ ہلوک آ بڑزکو کہولی دیوان اٹی اینخو مالی سال انا شونداری پروگرام اٹی اوار ڈٹ آتا پیش رفت نا جاچ ءِ ہلنگا۔ دیوان اٹی صوبائی وزیر میر ظہور احمد بلیدی، عبدالخالق ہزارہ، نور محمد دمڑ، ایڈیشنل چیف سیکرٹری ڈٹ بندی و شونداری، وزیراعلیٰ نا پرنسپل سیکرٹری تون اوار تعلقدار محکمہ غاتا سیکرٹری و ڈائریکٹر تعلقامہ عامہ ئسک بشخ ہلکر۔ ایڈیشنل چیف سیکرٹری ڈٹ بندی و شونداری نا کنڈآن دیوان ءِ اینخو مالی سال اٹی پوسکن و برجا شونداری ڈٹ آتا پیش رفت و ایلو سرجم حوال آتیا حوال تننگا وخت اس کہ تعلقدار محکمہ غاتا سیکرٹریک دیوان ءِ تینا تینا محکمہ غاتا پوسکن آ شونداری ڈٹ آتا تعلقدار فورم تیان منظوری نا بابت معلومدار کننگا۔ دیوان اٹی شونداری ڈٹ آتا تعلقدار فورم تیان منظوری، موکل نامہ و فنڈ آتا جاری کننگ نا ہم جاچ ءِ ہلنگا۔ محکمہ ڈٹ بندی و شونداری نا کنڈآن پاننگاکہ اینخو مالی سال اٹی 2286پوسکن آ شونداری ڈٹ آک اوار ءُ۔ برجاشونداری ڈٹ آک 1525ءُ وخت اس کہ دیوان ءِ اینخو مالی سال انا 184فلیگ شپ اسکیم تیا ہم حوال تننگا۔ دیوان ءِ مستی پاننگاکہ اینخو مالی سال انا پوسکن آ ڈٹ آتے ٹی 155پی ڈی ڈبلیو پی وخت اس کہ 2131ڈی ایس سی شونداری اسکیمک اوار ءُ۔ داوخت آ وزیراعلیٰ پارت کرے کہ پوسکن آ شونداری ڈٹ آتا منظوری نا فورم تا دیوان باقاعدگی اٹ اڈ تننگے۔ وزیراعلیٰ داسال ستمبر نا ایسر اسکان پوسکن آ ڈٹ آتا بنائی کارروائی ءِ پورو کننگ نا پارت کرسا پارے کہ غٹ ڈٹ آک اہم ءُ، تخوک آ مد اٹ پورو کننگروخت اس کہ سرکاری ماڑی تا ڈیزین آ خاص چکارکننگے۔ وزیراعلیٰ پارے کہ ہر بوائز و گرلز ڈگری کالج اٹ فٹسال گراؤنڈ آتا ڈٹ جوڑ کننگے تانکہ طالب علم آتے اسپورٹس نا آسراتی دوبننگ کے۔ اوپارے کہ شونداری ڈٹ آتا پوروی ءِ وخت آ و ہرحال اٹ آب اٹ جوڑ کننگے۔ برجاشونداری ڈٹ آتیا کاریم نا رفتار ءِ ترند کننگے۔ اوپارے کہ مچ آ صوبہ ٹی سڑک آتا جال اس تالان کرسا راجی و زرگزرانی شونداری نا ہدف آتے دوئی کینہ۔
