پاکستان محکمیں اوگانستان ءِ ھاترءَ کوشست  کنگ ءَ اِنت، ما خطہ ءُ میاں اوستمانی طاقت آنی گوما یک جاہ کار کنگ ءَ اِنت، ھال ءُ اھیوال کاری ءُ شنگکاری ءِ بنجاہی وزیر چوہدری فواد حسین ءِ درملکی حال  رسانکی ادارگ ءَ را گلگودار

اسلام آباد۔30اگست  (اے پی پی): حال ءُ اھیوال کاریءُ شنگکاری ءِ بنجاہی وزیر چوہدری فواد حسین ءَ گشتگ کہ پاکستان محکمیں اوگانستان ءِ ھاترءَ کوشست کنگ ءَ اِنت، ما خطہ ءُ میاں اوستمانی طاقت آنی گوما  یک جاہ کار کنگ ءَ اَنت،، گوست ءَ اوگانستان ءَ را تنا یل کنگ بوتگ، دنیا  گوست ءِ ردی ءَ را یک رندے پدا کنگ ءَ اِنت، اُمیت اِنت کہ پاکستان ءِ سروکی ءَ ترکی ءُ دمگی طاقت آنی کوشستاں چہ جوڑ بوہوکیں حکومت ءِ میاں اوستمانی طاقت ہم ہمراہ داری کنت۔ اے  ھیالانی درشانی آئی ءَ دوشمبے ءِ روچءَ درملکی حال رسانکی ادارگ ءَ را گلگودار داتگ ءُ کتگ۔ آئی   ءَ گشتگ کہ پاکستان ءَ بازیں وہدے ءَ گوں اوگاناں یکجاہ ہوار کار کتگ۔ وہدے کہ اوگانستان ءَ چہ روس دراَتکگ  اَت گڑا پُشت ءَ بازیں جیڑہ ءُ جنجال پشت کپتگ، نوں امریکا ء  ُ نیٹو فوج ءَ اوگانستان ءَ چہ زوت دراَتکگ اَنت۔ پاکستان ءَ اوگانستان ءِ ہوالگ ءَ چہ زمہ واریں کرد پیلو کتگ، بنجاہی وزیر ءَ گشتگ کہ پاکستان سالاں سال 35 لکھ اوگان لڑ ءُ باری آنی مہمان جہلی ءَ کنگ ءَ اِنت، مئے معیشت گیش بار چست کُت ناکنت۔آئی ءَ گشتگ کہ اے وہد ءَ لڑءُباریاناں ایچ وڑیں تکلیف نیست، مئے سیمسرانی سرءَ کار جاری اِنت، ما کابل ءَ چہ درملکی ءُ درملکی ادارگاں کار کنوکیں مردماناں در کتگ، پی آئی اے ءِ وسیلگ ءَ45 سد مردم کابل ءَ چہ درکنگ بوتگ، چوہدری فواد حسین ءَ گشتگ کہ لڑ ء ُ باریانی ھاترءَ سیمسرانی سرءَ بندوبست کتگ۔ آئی ءَ گشتگ کہ مزن وزیر عمران خان ءِ شورء ُصلہ ءَ را ڈلگ چار کنگ بوتگ، اشرف غنی ءَ اوگانستان ءَ لھس گچین کاری ناکتگ، یک  جامعی حکومت جوڑ کنگ نابوتگ، اے دو گامگیج نہ کنگ ءَ چہ مزنیں جیڑہ ءُ جنجال ودی بوتگ۔ آئی ءَ گشتگ کہ پاکستان  ءُ ترکی اے ہوالگ ءَ یکجاہ ہوار کار کنگ ءَ اَنت،پاکستان ءُ ترکی اوگانستان ءَ امنء ُ ایمنی ءِ وائشت  مند اِنت، اوگانستان ءَ  حکومت اوگانیاں جوڑ کنگی اِنت، اے ہوالگ ءَ خطہ ءِ ءُ میاں اوستمانی طاقتانی سرءَ مزنیں زمہ واری بیت۔ آئی ءَ اُمیت درشان  کتگ کہ پاکستان ءِ سروکی ءَ ترکی ءُدمگی طاقتانی کوشستاں چہ جوڑ بوہوکیں حکومت ءِ میاں اوستمانی طاقت ہم من اَنت ءُ ہمراہ داری کناں۔