اسلام آباد۔ 30اگست (اے پی پی) وزیراعظم عمران خان چیف سیکرٹری تے پرمان کرینے کہ او بنداوی المی آ گڑاتا نہادآتے ٹی سوگوی خاص وڑاٹ منڈی و پرچون نرخ آتے ٹی عقل آن پیشن پرخ ءِ چٹفنگ نا بابت ہرممکنہ انتظامی گام گیج آتے پک کیر، بورہ و خولم نا آخبت نا گرج آتے مون آ تخسا مفصل ڈٹ بندی و وخت آ گام گیج آتے پک کننگے۔ دوشنبے نادے آ وزیراعظم میڈیا آفس آن جاری بیان نا رداٹ وزیراعظم عمران خان نا کماشی ٹی بنداوی المی آ گڑاتا خواست و رسینگ و اوفتا نہاد آتا بابت جاچ دیوان اس اڈہلک۔ دیوان اٹی وزیر خزانہ شوکت ترین، وزیر صنعت و پیدوار مخدوم خسرو بختیار، وزیر ڈٹ بندی اسد عمر، وزیر خور سید فخرامام، سلاہکار واپار عبدالرزاق داؤد، وزیر مملکت حوالکاری فرخ حبیب، خصوصی کمکار ڈاکٹر شہباز گل، ڈاکٹر ثانیہ نشتر، جمشید اقبال چیمہ و تعلقدار وزارت آتا سیکرٹری صاحب آک بشخ ہلکر۔ صوبائی چیف سیکرٹری صاحب آک و سینئر آفیسر آک ویڈیو لنک انا کمک اٹ دیوان اٹی بشخ ہلکر۔ وزیراعظم ءِ مچ آ ملک اٹی لس بندغ نا کاریم اٹ اتوک آ بنداوی المی آ گڑاتا نہاد آتا خوڑتی اٹ جاچ خاص وڑاٹ منڈی وپرچون تا نرخ آتا تقابلی جاچ ءِ پیش کننگا۔ ملک اٹی بورہ و خولم نا ساڑی آ اسٹاک و آخبت نا گرج آتے پورو کننگ نا بابت کروک آ گام گیج آتیا ہم سرجم حوال تننگا۔ کنوئی آ تیل انا نہاد آتے ٹی پیدوار کمتی اتنگ نا بابت کروک آ گام گیج آتیان ہم دیوان ءِ معلومدار کننگا۔ چیف سیکرٹری پنجاب صوبہ پنجاب اٹی نہاد آتا بابت کروک آ انتظامی گام گیج آتیان معلومدار کرے۔ دیوان ءِ پاننگاکہ نہاد آتا سوگوی نا رداٹ تینازمواری تیٹی لغزش نا مرتکب آفیسر آتا برخلاف کارروائی کننگ انگ ءِ، داتم اسکان ہفت اسسٹنٹ کمشنر، مارکیٹ کمیٹی تا اِرا سیکرٹری تے اینک وخت اس کہ اِرا ڈپٹی کمشنر آتے وارننگ تننگانے۔ وزیراعظم ءِ پاننگاکہ کنوئی آ تیل انا نہاد آتے ٹی کمتی اتنگ کن تعلقدار اسٹیک ہولڈرآتون معاملہ گڈیکو مرحلہ غاتے ٹی ءِ، دافتا نتیجہ ٹی کنوئی آ تیل انا نہاد آتے ٹی دہ آن پانزدہ روپئی فی کلو کمتی نا گمان ءِ۔ داوخت آ وزیراعظم دیوان آن تران کرسا پارے کہ بنداوی المی آ گڑاتا نہاد آتیان لس بندغ زہمی مریک۔ اوپارے کہ لس بندغ نا رکھ ساڑی حکومت نا اولیت ءِ، وزیراعظم چیف سیکرٹری صاحب آتے پرمان کرے کہ بنداوی المی آ گڑاتا نہاد آتے ٹی سوگوی خاص کر منڈی و پرچون اٹی غیر منطقی پرخ ءِ چٹفنگ نا بابت ہرممکنہ انتظامی گام گیج آتے پک کننگے۔ وزیراعظم پارے کہ بیرہ انتظامی آفیسر آتا برخلاف کارروائی بس اف۔ انتظامی گام گیج آتا نتیجہ مون آ برے تانکہ الس ءِ ریلیف دوبرے۔ وزیراعظم پارت کرے کہ بورہ و خولم نا آخبت نا گرج آتے مون آ تخسا مفصل ڈٹ بندی و وخت آ گام گیج آتے پک کننگے۔
