اسلام آباد۔ 30اگست (اے پی پی) بنجائی وزیر سائنس و ٹیکنالوجی سینیٹر شبلی فراز پارینے کہ شفاف و بھروسہ نا قابل گچین کاری کن الیکٹرانک وونٹنگ مشین تیار کننگانے، الیکٹرانک وونٹنگ مشین اٹ ہرگڑا شفاف و آسان مریک و 15سکینڈ اٹ نتیجہ ملک، الیکٹرانک وونٹنگ مشین ءِ ہیک کننگ مفک، وونٹرآتے کن آگاہی مہم نا بناو عملہ ءِ تربیت تننگک، صوبائی اسمبلی، یونیورسٹی، چیمبرآف کامرس و بارکونسل آتے ٹی الیکٹرانک وونٹنگ مشین نا رونمائی ءِ کننگ انگ ءِ۔ اودوشنبے نادے آ انجینئرنگ یونیورسٹی پشاور اٹی دود آن تران کریکہ۔ اوپارے کہ نن گچین کاری اصلاحات آکاریم کرین، 90دے اٹی الیکٹرانک وونٹنگ مشین ءِ جوڑ کننگانے، گچین کاری تیٹی گنتی ٹی 18لکھ وونٹ زیان مریک، الیکٹرانک وونٹنگ مشین آن وونٹ زیان مفک۔ سینیٹر شبلی فراز پارے کہ گچین کاری تیٹی ٹیکنالوجی ءِ کاریم اٹ اتینہ، وزارت سائنس و ٹیکنالوجی آب اٹ الیکٹرانک وونٹنگ مشین اس تیارکرینے، الیکٹرانک وونٹنگ مشین ہیک مننگ کپک۔ اوپارے کہ وونٹنگ مشین اٹ ووٹرنا ریکارڈ مریک، وونٹنگ مشین آن جمہوریت ءِ فائدہ ءِ، آخبت گچین کاری ٹیکنالوجی نا کمک اٹ مریک۔ بنجائی وزیر سائنس و ٹیکنالوجی سینیٹر شبلی فراز پارے کہ نن خوانہ کہ اپوزیشن ہم تینا چاہندار آتے اتسا وونٹنگ مشین نا معائنہ ءِ کے، وونٹنگ مشین اٹ ووٹرآتا پرائیویسی رکھ مریک۔ شبلی فراز پارے کہ الیکٹرانک وونٹنگ مشینءِ الیکشن کمیشن نا آب انا رداٹ جوڑ کننگانے، وزیراعظم عمران خان ساف و شفاف گچین کاری تیا یخین تخک، حکومت نااست خواہی ءِ کہ گچین کاری چاگڑد ءِ قابل اعتبار جوڑ کننگے، خوانہ کہ الیکشن شفاف و قابل اعتبار مریر ہرافتے غٹ امنا کیر۔اوپارے کہ ننا مسخت بیرہ ڈگری جوڑ کننگ اف بلکن قابل انجینئر ودی کننگ ءِ، مستین اٹ تعلیم آ کس اس خاص چکارکتویسس، ملک انا آخبت کن اواری اٹ کاریم کینہ۔ اوپارے کہ ای خواوہ کہ دا انجینئرنگ یونیورسٹی قومی کہول آ گچین یونیورسٹی تیٹی شمار مرے۔ بنجائی وزیر پارے کہ ملک انا غٹ آبادی ءِ مون آ تخسا وونٹنگ مشین ءِ تیار کننگانے۔
