اسلام آباد۔ 30اگست (اے پی پی) بنجائی وزیر حوالکاری چوہدری فواد حسین پارینے کہ پاکستان سوگو اوغانستان کن کوشست کننگ ءِ، نن ڈیہہ و جہانی واکدار آتون اواری اٹ کاریم کننگ اُن، مستین اٹ اوغانستان ءِ تنیا ہلنگا، دنیا مست انا ردینک آتے ولدا کننگ ءِ۔ اومیت ءِ پاکستان نا سرکڑدہ ئی ٹی ترکی و علاقائی واکدارآتا کوشست آتے اٹ جوڑ مروک آ حکومت نا جہانی واکدارآک ہم مخ تفی ءِ کیرہ۔ داخیال آتا درشانی ءِ او دوشنبے نادے آ درملکی نشریاتی ادارہ ءِ انٹرویو ترسا کرے۔ اوپارے کہ پاکستان بھلو وخت اس اوغانی تتون کاریم کرینے، ہراتم اوغانستان آن روس پیش تما تو بھاز انگا ویل آک پدی سلیسر، داسہ امریکہ و نیٹو فوج ترندی اٹ پیش تمانو، داسہ پاکستان دا معاملہ غا سخت نظر تخانے، پاکستان اوغانستان نا بابت زموارانہ کڑد ادا کرینے، بنجائی وزیر حوالکاری پارے کہ پاکستان سال آتیان، 35لکھ اوغان مہاجرآتا مہمانداری ءِ کننگ ءِ، ننا زرگزران پین بھاریم ہرفنگ کپک، مستین اٹ اوغانستان ءِ تنیا ہلنگا۔ اوپارے کہ اوغانستان نا پیچیدہ حالیت آتا سوب جامع و مخلوط حکومت المی ءِ، اوغان ویل انا ایسری کن جہانی برادری نا کوشست المی ءِ۔ چوہدری فواد حسین پارے کہ ساڑی حالیت آتا رداٹ اوغانستان شدت پسند تنظیم تا مرکز بایدے جوڑ مف، پاکستان سوگو ءُ اوغانستان اسے کن کوشست کننگ ءِ۔ نن ڈیہہ و جہانی واکدارآتون اواری اٹ کاریم کننگ اُن، اوغانستان اٹی بدامنی نئے بیرہ پاکستان بلکن دنیا کن نسخاندہ ءِ۔ اوپارے کہ داوخت آ مہاجر آتے ہچ ءُ تنکی اس اف، ننا سیم تیا ہڑدے نارداٹ کاریم برجاءِ، نن کابل آن درملکی و درملکی ادارہ غاتے ٹی کاریم کروک آتے کشانن، پی آئی اے نا کمک اٹ 45سد بندغ آتے کابل آن کشنگانے۔ چوہدری فوا د حسین پارے کہ مہاجر آتے کن سیم آ بست وبند کرینن، اوغان مہاجرآتا بابت جامع حکمت عملی اس جوڑ کرینن، مستین آنبار حالیت ودی مفک، دنیا دا چیلنج اتون مون تننگ کن پاکستان نا کمک کن مون آ برے۔ اوپارے کہ اوغانستان نا بارواٹ وزیراعظم عمران خان نا مشورہ ءِ گوجالنگا، اشرف غنی اوغانستان اٹی لس گچین کاری تے کرفتو، جامع حکومت اس ٹہیفنگتو، دااِرا گام گیج کپننگ آن بھلو ویل ودی مس۔ اوپارے کہ پاکستان کوشست کننگ ءِ کہ اوغانستان اٹی جامع حکومت نا مخ تفی ءِ کننگے، روس، چین، پاکستان و اوغانستان آ تالان ٹرائیکا پلس اہم ءِ، دابابت خلیجی ملک و ایران نا ہم اہم ءُ کڑد اسے۔ اوپارے کہ پاکستان و ترکی دامعاملہ غا اواری اٹ کاریم کننگ ءُ۔ پاکستان وترکی اوغانستان اٹی امن نا خواہندار ءُ، اوغانستان اٹی حکومت اوغانی تے ٹہیفوئی ءِ، دابابت ڈیہہ نا و جہانی واکدارآتیا بھلو زمواری اس بیٹ مریک۔ اواومیت ظاہرکرے کہ پاکستان نا سرکڑدہ ئی ٹی ترکی و علاقائی واکدار آتا کوشست آتے اٹ جوڑ مروک آ حکومت نا جہانی واکدارآک ہم مخ تفی ءِ کیرہ۔
