اسلام آباد۔ 30اگست (اے پی پی) گوادر بندرگاہ نیامی ایشیاکن بھاز اہمیت تخوک ءُ ڈٹ اسے، چین۔پاکستان اقتصادی راہداری نیامی ایشیائی ملک آتا راجی و اقتصادی شونداری کن چندی وارخواہی فراوان کیک۔ سی پیک اتھارٹی کمامدارآتارداٹ سی پیک نا رداٹ تیار کروک آ پاکستان نا گوادر بندرگاہ نا کمک اٹ نیامی ایشیائی ملک آک علاقائی واپار و رابطہ کاری ءِ زیات آن زیات مون آ دننگ کیرہ۔ پاکستان نا سویل دیکی ٹی گوادر پورٹ اسہ اہم ءُ لاجسٹک، واپار، مون آ بروک صنعت، سائنس و ٹیکنالوجی، دودوربیدگ و تعلیم نا مرکز اس جوڑ مننگ نا کنڈآ ہِننگ ءِ۔ داوخت آ گوادر پورٹ انا شونداری نئے بیرہ بلوچستان بلکن جم وڑاٹ پاکستان نا زرگزرانی شونداری ءِ مون آ دننگ ءِ۔ گوادر بندرگاہ اوغانستان، تاجکستان و نیامی ایشیانا ایلو ملک آتے کن خڑک انگا سمندری بندرگاہ، علاقائی لاجسٹک و شپنگ سینٹراس جوڑ مریک۔ کمامدارآک پاریر کہ چین پاکستان اقتصادی راہداری (سی پیک) نا رداٹ گوادر اٹی اہم ڈٹ آتے ٹی گوادر پورٹ انا اپ گریڈیشن، ایکسپریس وے، گوادر انٹرنیشنل ایئرپورٹ و گوادر فری زون وپورٹ ڈویلپمنٹ تون اوار چندی ڈٹ آتیاکاریم ترندی اٹ برجاءِ۔ بنجائی حکومت اینخو مالی سال اٹی چین پاکستان اقتصادی راہداری کن سرکاری بشخ انا شونداری پروگرام کن بھلوزراس جتاکرینے، حکومت مالی سال نا بجٹ اٹی چین پاکستان اقتصادی راہداری نا ڈٹ ءِ خاص اہمیت تننگ ءِ تانکہ دانا پوروی آن ملک انا اقتصادی و زرگزرانی شونداری و شونہالی نا ہدف آتے ٹی کمک دوئی کننگ مرے۔ گوادر بندرگاہ نا وس ءِ ودفنگ کن گوادر اپ گریڈیشن ڈٹ ہراٹی ساڑی آ کثیر المسخت ٹرمینل نا ودکی و ایسٹ بے ایکسپریس وے، گوادر ایئرپورٹ آکاریم ءِ ترند کننگ تون اوار اوار گوادر اٹی واٹرسپلائی اسکیم آ دمدستی کاریم نا بناءِ کننگ آامنا کننگا گوادر شار ءِ ڈٹ بندی نا رداٹ تفنگ کن گوادر ماسٹرپلان ءِ پورو کننگ نا پارت کننگا، گوادر اٹی مسہ سد میگاواٹ بجلی ڈٹ آتیا کاریم برجاءِ بجلی نا گرج ءِ پورو کننگ کن کولاآن چلینگوک آ ڈٹ 2022اٹی پورومریک۔ گوادر فری زون و پورٹ ڈویلپمنٹ نا چندی ڈٹ و گوادر ووکیشنل انسٹی ٹیوٹ نا تعمیراتی کاریم ءِ پین ترند کننگ نا فیصلہ کننگا، گوادر فری زون اٹی زرکاری نا چرجوئی بناکرینے ہراڑے اسٹیل، پٹروکیمیکلز و ایلوصنعت آتا جوڑ کننگ آ کاریم بناکرینے۔ دا ڈٹ آتا پوروی آن نئے بیرہ ہندی مخلوق ءِ روزگارنا وارخواہی دوئی مریک و ملکی برآمد آتے ٹی داڑآن خاطرخواہ ودکی مریک۔
