بھارت اوغان مہاجرآتون امتیازی سلوک کننگ ءِ، بھارتی حکومت بیرہ ہند و سکھ مہاجرآتے ملک اٹ پترینگ انگ نا موکل تننگ ءِ، حوال

اسلام آباد۔ 27اگست (اے پی پی) بھارتی حکومت بیرہ ہند و سکھ مہاجرآتے ملک اٹی پترینگ انگ نا موکل ترسا اوغان مہاجرآتون امتیازی سلوک نا درشانی ءِ کننگ ءِ و ایلو مذہب و چین تیان تعلق تخوک آ مہاجرآتا حوصلہ شکنی ءِ کننگ انگ ءِ ہراڑآن بھارتی سرکڑدہ غاتا امتیازی و ہندوتوا ذہنیت نا عکاسی مریک۔ دارالحکومت نئی دہلی ٹی 10ہزار نا خڑک اوغان مہاجرءُ، ہرافتیان 90درسد نا تعلق ہندو و سکھ برادری آن ءِ۔ جہانی میڈیا رپورٹ آتا رداٹ اوغانستان آن بروک آ مہاجرآتے اِراسال اکن سیاسی پناہ تننگ انگ ءِ و ویزہ نا معیاد چٹنگ آن پد اوفتے اوغانستان آ پدی ہنوئی مریک۔ دارداٹ بھارت نا امتیازی کڑد ءِ بے نقاب کننگ نا گرج ءِ و ایلو کنڈآ مہاجرآتے آسراتی تننگ اٹ پاکستان نا کڑد ءِ تالان کننگ نا گرج ءِ۔ زیات تر اوغان مہاجرآتے بھارت اٹ آسراتی اسکان رسینگ اٹ ویل مون تروک ءِ انتئے کہ اوفتے تون شہریت اف۔ بھارت اوغان مہاجرآتون امتیازی و ناروا سلوک کننگ ءِ۔ بھارتی حکومت نا امتیازی رویہ نا سوب آن بھارت اٹی اوغان مہاجرآتے بے پک آخبت مون تروک ءِ۔ اوغان شاریک اولیکو وار 1970نا دہائی نا ایسر اٹ سوویت جنگ اٹی ہندوستان آ ہمپیر۔ اوغان مہاجرآتے سم کارڈ و گیس سلنڈر کون آ بنداوی آسراتی تا دوئی کننگ کن ہم سخت جہد کروئی تمک۔ بھارت پناہ گزین آتا 1951نا اقوام متحدہ نا کنونشن نا دستخط کنندہ اف و نئے اونا مہاجرآتا بابت تینا مخصوص ءُ کانود اسے۔ ہنداخاطرآن دا اوغان مہاجرآتون گندہ سلوک کیک۔ اوغانی تے اسُل شہریت ملیپک ولے او ہندوستان اٹی اِراسال اکن ویزہ غا رہینگرہ و اِراسال انا معیاد چٹنگ آن پد اوفتے اوغانستان آ پدی برسا تینا ویزہ ءِ پوسکن کرفوئی تمک۔ داہندوستان اٹی مودی نا سرکڑدہ ئی والا بی جے پی حکومت نا امتیازی رویہ نا پیدوار اشارہ اسے ہرا ہندوتوا نا نظریہ ءِ مون آ دیک۔ مذہبی امتیاز نا پالیسی نا السی وڑاٹ پڑوءِ کرسا، بھارتی حکومت نئے بیرہ اوغانستان آن پیش تمنگ نا خواہندار لکھ آ مسلمان تے ہلانے بلکن اونا چکار ہندو و سکھ آتیاٹی ءِ، ہراکہ داسکان اوغانستان اٹی اختہ ءُ۔