اسلام آباد۔ 27اگست (اے پی پی) وزیر مملکت حوالکاری و شینکاری فرخ حبیب پارینے کہ مچ آ دنیا ٹی رہینگوک آ اوورسیز پاکستانی تے اُرا، ڈغار نا ہلنگ اٹ بھاز انگا ویل آک مون تروک ئسر، روشن اپنا گھر اسکیم نا رداٹ دا مشکل آک آسانی اٹ بدل مریرہ، وزیراعظم عمران خان پیشن نا ملک اٹی رہینگوک آ پاکستانی تیکن روشن اپنا گھر اسکیم نا بناءِ کرینے۔ جمعہ نادے آ تینا ٹویٹ اٹی اوپارے کہ پیشن نا ملک اٹی پاکستانیک پروسیس نا کمک اٹ پاکستان اٹ ہاؤسنگ اٹ زرکاری و آسان فنانسنگ دوئی کننگ کیرہ، اسٹیٹ بینک پوسکن آ پاکستان ہاؤسنگ اتھارٹی تون اوار غٹ اسٹیک ہولڈر آتون سلابت آن پد داسکیم ءِ تیار کرینے۔ اوپارے کہ روشن اپنا گھر اسکیم اٹ روشن ڈیجیٹل اکاؤنٹ تخوک آ اوورسیز پاکستانیک زرکاری کننگ کیرہ، روشن اپنا گھر اسکیم اٹ اُراہلوک آ ک ہراوخت اوفتا است خوائے تینا اُراءِ بہا ہم کننگ کیرہ، روشن اپنا گھر اسکیم کن مہالو آن منظور مروک ڈٹ آتا لڑءِ شین تننگانے و وخت اتون اوار اوار ڈٹ آتے ٹی ودکی مرسا کیک۔
