اسلام آباد۔ 27اگست (اے پی پی) بنجائی وزیر خزانہ و محصولات شوکت ترین پارینے کہ حکومت جامع و پائیدار اقتصادی ودکی نا سفر نا کنڈآ ہِننگءِ، قومی زرگزران نا اہم ٹک آک گچینی نا ڈیک ءِ تننگ ءُ، اقتصادی مشاورتی کونسل نا چندی پڑک آتا کنڈآن پیش کروک سلاہ و سوج و پالیسی تیا عملدرآمد کن پاکستان انسٹی ٹیوٹ آف اکنامک ڈویلپمنٹ پائیڈ آن ماہرآتے ہلنگک، داچاہندارآک چندی وزارت آتون کمک کیرہ و داپڑک آتا مقرر کروک ہدف آتیا پیش رفت نا بارواٹی وزیراعظم ءِ ماہانہ پریزنٹیشن تننگک، ڈٹ بندی آن بیدس پائیدار شونداری و ودکی نا ہدف آتے دوئی کننگ مفک، 1972ء آن پد اولیکو وار ملکی تاریخ اٹی چندی بشخ آتے ٹی ودکی کن جامع ڈٹ بندی کننگ انگ ءِ۔ جمعہ نادے آ داڑے بنجائی وزیر قومی غذائی رکھ و پٹ وپول سید فخرامام، وزیر صنعت و پیدوار مخدوم خسروبختیار، وزیراعظم نا سلاہکار زرکاری و واپار عبدالرزاق داؤد، وزیراعظم نا سلاہکار ادارہ جاتی اصلاحات ڈاکٹر عشرت حسین و اقتصادی مشاورتی کونسل نا ایلو باسک آتون اوار پریس کانفرنس کرسا بنجائی وزیر خزانہ شوکت ترین پارینے کہ1972ء آن پد اولیکو وار منظم وڑاٹ قومی زرگزران نا اہم بشخ آتا بابت منظم ڈٹ بندی کننگانے۔ قومی اقتصادی مشاورت کونسل اٹ نجی بشخ انا اسٹیک ہولڈرآتے اوار کننگانے، نن 14اولیتی بشخ آتا پیدواری ءِ کرین و اوفتے کن گونڈ، نیامی و مریس میعاد پالیسی و ہدف آتا تعین کرین۔ اوپارے کہ اقتصادی مشاورتی کونسل نا چندی پڑک آتا کنڈآن پیش کروک سلاہ و سوج و پالیسی تیا عملدرآمد کن پاکستان انسٹی ٹیوٹ آف اکنامک ڈویلپمنٹ (پائیڈ) آن ماہرآتے ہلنگک، داماہرین آک چندی وزارت آتون کمک کیرہ و دا پڑک آتا مقرر کروک ہدف آتیا پیش رفت نا بارواٹ وزیراعظم ءِ ماہانہ پریزنٹیشن تننگک، دابابت منظم وڑوڈول اس جوڑ کننگانے۔ اوپارے کہ جامع و پائیدار اقتصادی ودکی نا دوئی کننگ کن سفرنا بناءِ کننگانے۔
