کوئٹہ۔ 26 اگست (اے پی پی) عمران خان ملک و قوم ءِ امریکہ نا جارآن آجو کرفے، داسہ ہچ گہس پاکستان آن ڈومور نا خواست کننگ کپک، طالبان تا سرسہبی آن پد پاکستان اٹی تدوک آ اِرا عشرہ غاتیان مروک آ دہشت گردی ہم چٹک۔ عمران خان نا اوغان پالیسی 100 درسد سرسہب مس۔ داخیال آتا درشانی ءِ تحریک انصاف کوئٹہ ڈسٹرکٹ نا صدر حاجی سیف اللہ کاکڑ ”اے پی پی“ تون گپ وتران کرسا کرے۔ اوپارے کہ وزیراعظم عمران خان ملک انا اسٹ انگا حکمران ءِ ہرا امریکی پریشر اٹی بننگ نا جاگہ غا ملک انا فائدہ غاتے مون آ تخسا فیصلہ کرے اونا دلیرانہ و جیرت انگا فیصلہ غاتا سوب آن پاکستان امریکہ نا جار آن پیش تمنگ اٹ سرسہب مس، وزیراعظم امریکہ غا پیدوار کرے کہ نن نئے نما جنگ اٹی بشخ ہلینہ و نئے تینا فائدہ غاتا برخلاف فیصلہ کینہ۔ اوپارے کہ وزیراعظم نا اوغان پالیسی ہم سرسہب مس امریکی فوج ءِ ڈیہہ آن کشنگ اٹ وزیراعظم عمران خان بے کچ اہم ءُ کڑد اس ادا کرے طالبان تا سرسہبی آن پد داسہ اوغان گل زمین ننا برخلاف اسل کاریم اٹ اتنگپک و ہنداوڑ ملک اٹی تدوک آ 20سال آن برجادہشت گردی چٹک۔ اوپارے کہ انشاء اللہ داسہ تحریک انصاف نا دور حکومت و عمران خان نا کماشی ٹی پاکستان تینا سفر نا بناءِ کننگ والا ءِ۔
