اوغانستان آن پیش تمنگ اٹ کمکاری آ پاکستان نا منت وار اُن، یورپی یونین نا سفیر اینڈ رولا کامینارانا ٹویٹ

اسلام آباد۔ 26اگست (اے پی پی) پاکستان اٹی یورپی یونین نا سفیر اینڈ رولاکامینارا اوغانستان آن پیش تمنگ اٹ کمکاری آ پاکستان نا پبی منت واری ءِ ہرفینے۔ پنچ شنبے نادے آ تینا ٹویٹ اٹی اینڈرولاکا مینارا پارینے کہ اوغانستان آن اوفتا پیش تمنگ پورو مسنے و اسلام آباد بالی پٹ انا کمک اٹ داپیش تمنگ کن دے و نن کاریم کننگ آ او پاکستان نا وزارت خارجہ، پی آئی اے، اسلام آباد بالی پٹ انا عملہ، سول ایوی ایشن اتھارٹی و ای یو پاکستان ٹیم انا بھاز منت واری ءِ ہرفک۔ اوتینا ٹویٹ اٹ اسلام آباد بالی پٹ آ یورپی شاری و اوفتا کمک ءِ کننگ آ پاکستانی کمامدار و عملہ نا عکس آتے ہم شیئر کرینے۔ تینا پین اسہ ٹویٹ اسے ٹی اوپارے کہ پی آئی اے ءِ یورپی فضائی دنگ اٹ جہاز آتا موکل تننگ نا معاملہ غا پیش رفت مسنے۔ اوپیدوار کرے کہ یورپی یونین نا فضائی دنگ اسکان رسینگ کن یورپی ایوی ایشن اتھارٹی نا کانود بھاز شفاف ءِ و یورپی یونین و پی آئی اے پدسلوک آ باندات آتیا اواری اٹ کاریم کننگ ءُ و دا چرجوئی ٹی پیش رفت مننگ ءِ۔ اوپارے کہ دُن تو نن اسلام آباد بالی پٹ آن یورپی ملک آتے کن پی آئی اے ءِ کاریم اٹ اتنگ کتون ولے پی آئی اے دا پیش تمنگ اٹ قابل قدر کمک کرے۔