علامہ اقبال انڈسٹریل سٹی ٹی ڈویلپمنٹ نا اولیکو ریسہ پورو،ارٹ میکو ریسہ بروک آ سال پورو و انڈسٹریل سٹی 2024اسکان پورو وڑاٹ فعال مریک، میاں کاشف اشفاق

فیصل آباد۔ 26اگست (اے پی پی) پاک چین اقتصادی راہداری نا رداٹ جوڑ مروک آ ملک انا اولیکو اولیتی اکنامک زون علامہ اقبال انڈسٹریل سٹی فیصل آباد اٹی ڈویلپمنٹ نا اولیکو ریسہ پورو مس و داوخت آ داڑے 20آن زیات صنعتی یونٹ پیدواری عمل نا بناءِ کرینو وخت اس کہ ہندا اکنامک زون اٹی ڈویلپمنٹ نا ارٹ میکو ریسہ بروک آ سال پورو و دا انڈسٹریل سٹی 2024اسکان پورو وڑاٹ فعال مریک ہراڑآن کم و ود دونیم لکھ ملازمت و چار ارب ڈالر نا زرکاری نا گمان ءِ، نیز داڑے چینی زرکارآتے کن اسہ ہزار ایکڑ ڈغار اس جتا کرسا اونا ڈویلپمنٹ کن چینی ڈویلپرآتون جوائنٹ وینچرکننگ نا سلاہ غاہم سجفنگ انگءِ۔ فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی نا چیئرمین میاں کاشف اشفاق خالد منصور ءِ سی پیک کن وزیراعظم نا سلاہکار پن و اونا عہدہ ءِ وزیر مملکت نا بریبر کننگ آ خوشی نا درشانی ءِ کرسا پارے کہ داڑآن چین انا پت بحال و اونا کماشی ٹی سی پیک پروجیکٹ پین ترند رفتاری اٹ مون آ کاہک۔ اووزیراعظم نا داگام انا ہم ستاءِ کرے کہ سی پیک نا بابت پلاننگ کمیشن و بورڈ آف انویسٹمنٹ نا تعلقدار بشخ آتے ہم خالد منصور نا پورٹ فولیو ٹی اوار کننگانے ہراڑآن فیصلہ سازی و اوڑآ عملدرآمد اٹ ترندی بریک۔ اوپارے کہ علامہ اقبال انڈسٹریل سٹی فیصل آباد سی پیک نا رداٹ جوڑ مروک آ گچین اکنامک زون ءِ و ہرارفتار اٹ داڑے ڈویلپمنٹ و زرکاری مننگ ءِ اوایلو اکنامک زون تیکن درور اسے۔ اوپارے کہ علامہ اقبال انڈسٹریل سٹی ٹی ایکسپورٹ بیسڈ انڈسٹری و درآمد آتا گیگ بدل مصنوعات تیار کروک آ صنعت آتے اولیت تننگ انگ ءِ۔ اوپارے کہ دنیا نا ایلو ملک آتے ٹی چین نا ری لوکیٹ مروک آ انڈسٹری نا پاکستان تون موازنہ تیار کرسا پاکستان نا اکنامک زون تے جہانی کہول آ مارکیٹ کننگ کن ہم گام گیج کننگک۔