اسلام آباد۔ 26اگست (اے پی پی) بنجائی وزیر حوالکاری و شینکاری چوہدری فواد حسین پارینے کہ پاکستان اٹی ہراجماعت آک 30سال حکومت کریر، اینو او تینا مون ءِ ڈکھنگ ءُ، تحریک انصاف اسٹ انگا حکومت ءِ ہرا الس نا مون آ تینا کارکڑد ءِ گمر اٹ پیش کننگ ءِ، غٹ وزارت آتا کارکڑد ءِ پیش کننگ پوسکن ءُ روایت اسے، اینو ننا خارجہ پالیسی خوداری آ مبنی ءِ، اوغانستان اٹی ننا کڑد ءِ اینو مچ آ دنیا امنا کننگ ءِ، وزیراعظم عمران خان پاکستان ءِ جہانی افق آ ایس، کشمیر، فلسطین تون اوار ایلو بھلا ویل آتیا ننا اسہ توار اسے، تحریک انصاف نا حکومت بزغرآتا فائدہ ٹی چندی گام گیج کرے، شیفکو تپہ کن احساس پروگرام نا بناءِ کرے، سائنس و ٹیکنالوجی تون اوار چندی بشخ آتے ٹی پوسکنی ایس، نن الس تون کروک آ غٹ قول آتے پورو کرین، وزیراعظم عمران خان اینو تینا حکومت نا آخبت نا لائحہ عمل ءِ پیش کیک۔ داخیال آتا درشانی ءِ او پنچ شنبے نادے آ داڑے میڈیا تون گپ وتران کرسا کرے۔ داوخت آ وزیر مملکت حوالکاری و شینکاری فرخ حبیب ہم ساڑی ئسک۔ بنجائی وزیر حوالکاری پارے کہ اینو سی سال پورو مننگ آ ننا موٹو”لگن‘ انصاف، انسانیت و خودداری ننا مزل“ ءِ۔ اوپارے کہ پاکستان تحریک انصاف نا حکومت انصاف، انسانیت و خودداری کن کاریم کرے، مستین اٹ 30سال حکومت کروک آک اینو تینا مون ءِ ڈکھنگ ءُ، ولے وزیراعظم عمران خان نا کماشی ٹی تحریک انصاف نا حکومت تینا مسہ سال انا کارکڑد ءِ گمر اٹ الس نا مون آ پیش کننگ ءِ۔ اوپارے کہ اسہ سیاسی جماعت اسے ٹی ہم جیرت اف کہ او الس نا مون آ برسا اوفتے تون کروک آ قول آتیا تینا کارکڑد ءِ پیش کننگ کے۔ چوہدری فواد حسین پارے کہ وزیراعظم عمران خان اینو غٹ وزارت آتا مسہ سال انا کارکڑد آ مبنی ایئربک انا ہم بناءِ کننگ ءِ، ہر وزارت تینا کارکڑد ءِ الس نا مون آ پیش کننگ ءِ، نن الس تون کروک آ غٹ قول آتے پورو کرین۔ اوپارے کہ وزارت حوالکاری و شینکاری اینو نا دود انا میزبان ءِ، حکومت غٹ وزارت آتا کارکڑد ءِ الس نا مون آ پیش کیک۔ چوہدری فواد حسین پارے کہ نن پورو حساب وکتاب و راستکی تے اٹ تینا کارکڑد رپورٹ ءِ الس نا مون آ تخنہ۔ نن بزغرآتا آسودہی کن چندی گام گیج کرین، بزغرآتا کٹیا ٹی ودکی مس، بزغرآتے 1100ارب روپئی نا ودکی کٹیا مس، ہراتم کٹیا ٹی ودکی مریک تو کبینی ٹی ودکی غیرمتعلقہ مریک۔ اوپارے کہ نن شیفکو تپہ کن احساس پروگرام نا بناءِ کرین، پاکستان نا تاریخ اٹ اولیکوو ار ہفتاد سال آن پد بھلو اصلاحات کرین، سائنس و ٹیکنالوجی تون اوار ایلو بشخ آتے ٹی پوسکنی اتنگا۔ اینو ننا خارجہ پالیسی خوداری آ مبنی ءِ، اوغانستان اٹی ننا کارکڑد ءِ مچ آ دنیا امنا کننگ ءِ، وزیراعظم عمران خان پاکستانی ءِ جہانی افق آ پدی ایس، مسلم امہ نا لیڈرشپ پاکستان آ پدی بس، کشمیر، فلسطین تون اوار ایلو بھلا ویل آتیا ننا اسہ توار ءِ، اوغانستان نا بابت ننا کڑد دنیا نا مون آٹی ءِ۔ اوپارے کہ وزیراعظم تینا حکومت نا آخبت نا لائحہ عمل ءِ ہم پیش کیک، تحریک انصاف تینا پنچ سال ءِ پورو کیک و بروک آ پنچ سال ہم تحریک انصاف نا ہی مریرہ۔
