لاہور۔ 26اگست (اے پی پی) فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) نا ریجنل چیئرمین چوہدری محمد سلیم بھلر و تحریک انصاف نا سینئر راہشون راجہ محمد سلیم ئسک وزیر مملکت حوالکاری و شینکاری فرخ حبیب تون اونا دفتر اٹی اوڑدہی کریر، و کاروباری برادری ءِ مون تروک ویل و تینا سلاہ تیان معلومدار کریر، ایف پی سی سی آئی نا ریجنل آفس آن جاری بیان نا رداٹ وزیر مملکت محمد سلیم بھلر و راجہ محمد سلیم تون گپ وتران کرسا پارے کہ ایف پی سی سی آئی نا سلاہ تے قومی اسمبلی نا فورم آ ہرفنگک۔ اوفک پاریر کہ ملکی زرگزران شون ہلنگ ءِ، ملکی برآمد آتا کچ سی ءُ یک ارب ڈالر اسکان سرمسنے۔ کورونا دین آن پد ہم فیڈرل بورڈ آف ریونیو چار ہزار ہفت سد ءُ سی ءُ دو ارب روپئی دوئی کرینے۔ حکومت کورونا دین انا مون ءِ توننگ کن سمارٹ لاک ڈاؤن و دانشمندانہ کوشست کرے۔ وزیر مملکت مستی پارے کہ ملک اٹی چندی ڈیم و دیر انا گیشتر کوڑی جوڑ کننگ کن کاریم مننگ ءِ۔ داگام گیج آتیان دیر کوڑی کننگ نا لائخی ٹی ودکی مریک و مخلوق ءِ بجلی نا فراوانی نا آسراتی ہم دوئی مریک۔ داوخت آ ایف پی سی سی آئی نا ریجنل چیئرمین چوہدری محمد سلیم بھلر سلاہ ترسا پارے کہ ملک اٹی یک و نیم کروڑ آن زیات بجلی نا کمرشل کنکشن ساڑی ءُ اوفتے خراج نیٹ اٹ اوار کننگے۔ ساڑی آ خراج نظام بروک آ چین تیکن پائیدار اف، ملک انا کل آبادی نا اسہ درسد مخلوق مچ آ ریاست نا بھاریم ءِ ہرفنگ ءُ۔ اومستی پارے کہ ملک انا 22 کروڑ مخلوق آن 20لکھ آن ہم کم مخلوق خراج گوشوارہ جمع کرفرہ، 85درسد آن زیات کراج ملک انا 300کمپنی اداکیرہ، 75درسد آن زیات خراج مینو فیکچرنگ سیکٹر آن یکجا کننگ انگ ءِ وخت اس کہ ملک انا مینو فیکچرنگ سیکٹر و صنعتی بشخ بھاز بے وڑ زہمی مننگ ءُ۔ سلیم بھلر مستی پارے کہ پالیسی تیٹی بھاز انگا خامی تا سوب آن کاروباری تپہ خراج نیٹ اٹ بننگ آن پاناد ءُ۔
