بنجائی وزیر انسداد منشیات اعجاز احمد شاہ تون امریکی ڈل انا اوڑدہی

اسلام آباد۔ 26اگست (اے پی پی) بنجائی وزیرانسداد منشیات اعجاز احمد شاہ پارینے کہ منشیات نا برخلاف کارروائی تے پین سوگو کننگک، وزارت تینا گچین وسیلہ غاتے کاریم اٹ اتسا منشیات نا برخلاف جنگ اٹ تینا پبی کڑد ءِ ادا کیک۔ داہیت ءِ او پنچ شنبے نادے آ آئی این ایل پی نا پوسکن آ ڈائریکٹر مارک تیرواکروسکی نا کماشی ٹی بروک آ مسہ باسکی امریکی ڈل اتون اوڑدہی کرساکرے۔ اوڑدہی ٹی امریکی ڈل لائحہ عمل نا ستاءِ کرے و ہروڑ کمکاری نا باوری کرفے۔ بنجائی وزیر پارے کہ منشیات نا ڈیمانڈ اٹی کمتی کن بھلو بجٹ اس جتا کننگانے، ڈیمانڈ ءِ کم کرسا نن منشیات نا دادین انا مون ءِ توننگ کینہ۔ اعجاز احمد شاہ منشیات نا سمگلنگ نا توننگ نا لائحہ عمل نا بارواٹ سرجم گپ وتران کرے، اوپارے کہ داسال انا ایسر اسکان منشیات نا برخلاف بھلو ہدف اس دوئی کینہ، اوڑدہی نا ایسر داقول اتون مس کہ بروک آ دے تیٹی تین پہ تینی تعلقداری تے پین سوگو کننگک۔