وزیرخارجہ شاہ محمود قریشی نا ترکمانستان نا صدر قربان قلی بردی محمدوف تون اوڑدہی

اسلام آباد۔ 26اگست (اے پی پی) وزیرخارجہ مخدوم شاہ محمود قریشی پارینے کہ پاکستان، تاپی تون اوار چندی ڈٹ آتا کمک اٹ ترکمانستان تون ہڑتوم آ کنڈآتا تعلقداری نا سوگوی و اقتصادی رابطہ غاتا مون آدننگ کن سنبرینگوک ءِ۔ دفترخارجہ نا رداٹ وزیرخارجہ مخدوم شاہ محمود قریشی پنچ شنبے نادے آ اشک آباد اٹی ترکمانستان نا صدر قربان قلی بردی محمدوف تون اوڑدہی کرے۔ وزارت خارجہ ترکمانستان نا سینئر کمامدارآک ہم داوخت آ ساڑی ئسر۔ وزیر خارجہ ترکمانستان نا صدر قربان قلی بردی محمدوف ءِ وزیراعظم عمران خان نا کنڈآن نیک است خواہی نا کلہو ءِ سرکرے و پارے کہ پاکستان، ترکمانستان تون ہڑتوم آ کنڈآتا تعلقداری تے خاص اہمیت ایتک۔ پاکستان، تاپی تون اوار چندی ڈٹ آتا کمک اٹ ترکمانستان تون ہڑتوم آ کنڈآتا تعلقداری تا سوگوی و اقتصادی رابطہ غاتا مون آ دننگ کن سنبرینگوک ءِ۔ وزیرخارجہ ترکمانستان نا صدر ءِ اوغانستان نا بدل مروک آ حالیت آتا بابت پاکستان نا نقطہ نظر آن معلومدار کرے۔ اوپارے کہ نن تکنہ کہ اسہ پرامن و سوگو اوغانستان ڈیہہ ٹی واپار، زرگزرانی شونداری و رابطہ غاتا مون آ دننگ نا بابت اسہ وڑاٹ فائدہ نا سوب مریک۔ ترکمانستان نا صدر قربان قلی بردی محمدوف وزیرخارجہ ءِ ترکمانستان آ بننگ آ بخیر کرسا، اوغانستان نا حالیت آتا رداٹ، علاقائی کہول آ امنائی لائحہ عمل اس تینا کننگ کن وزیرخارجہ نا عملی کوشست آتا ستاءِ کرے۔