وزیراعظم عمران خان تون اقوام متحدہ نا جہانی ادارہ خورانا ایگزیکٹو ڈائریکٹر نا اوڑدہی

اسلام آباد۔ 26اگست (اے پی پی) وزیراعظم عمران خان تون روم اٹی جوڑ اقوام متحدہ نا جہانی ادارہ خور انا ایگزیکٹیو ڈائریکٹر ڈیوڈ ایم بیسلے پنچ شنبے نادے آ داڑے اوڑدہی کرے۔ وزیراعظم آفس آن جاری بیان نا رداٹ وزیراعظم جہانی ادارہ خور انا داکڑد انا ستاءِ کرے ہرا دے او ہلہلہ ئی حالیت آتے ٹی جہانی انسانی ہمدردی نا ادارہ غاتے خور انا کمک فراوان کننگ و مچ آ دنیا ٹی چندی ملک آتے ٹی خور و غذائی حالیت آتے گچین کننگ کن کننگ ءِ۔ وزیراعظم پارے کہ پاکستان تینا داڑے چلیفنگوک آ جہانی ادارہ خور انا چندی ڈٹ آتیان فائدہ ہرفسا کرینے۔ اوپارے کہ پاکستان جہانی ادارہ خور اتون شریداری نا قدر ءِ کیک۔ وزیراعظم و جہانی ادارہ خور انا ایگزیکٹو ڈائریکٹر نا نیام اٹ اوڑدہی ٹی اوغانستان اٹی ودی مروک آ حالیت آتیا ہم گپ وتران کننگا۔ وزیراعظم اوغانستان اٹی جامع حکومت نا ٹہیفنگ نا گرج آ زور شاغسا پارے کہ جہانی برادری اوغانستان تون مثبت تعلقداری قائم کے ہرانا نتیجہ ٹی اوغانستان اٹی ہروڑنا انسانی المیہ غان بچنگ مریک و ملک اٹی امن و سوگوی ءِ پک کننگ مریک۔ جہانی ادارہ خور انا ایگزیکٹیو ڈائریکٹر اقوام متحدہ نا ورلڈ فوڈ پروگرام نا کنڈآن اوغانستان اٹی خور انا کمکاری کن پاکستان نا آسراتی کڑد آ اونا منت واری ءِ ہرفے۔ اواوغانستان نا الس ءِ انسانی ہمدردی نا رداٹ کمکاری ءِ برجاتخنگ نا وڑوڈول آتیا وزیراعظم تون گپ وتران کرے۔