لاہور۔25اگست (اے پی پی): مزن وزیر عمران خان ءَ گوں گورنر گس لاہور ءَ چیف سیکرٹری پنجاپ جواد رفیق ملک ءُ آئی جی پنجاپ انعام غنی ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءَ سر وزیر پنجاپ سردار عثمان بزدار ھم ساڑی ات۔ گند ءُ نند ءَ صوبگ ءِ ایمنی ءِ ھواریں جاور ھال آں ابید کبزہ مافیا ءِ ھلاپ ءَ کاروائی، گران بھائی ءُ امبار آں چیر دیوک آنی گر ءُ دار ءِ واستہ انتظامیہ ءِ گامگیج آنی بابت ءَ مزن وزیر ءَ را بریفنگ دیگ بوت۔ سرجمیں صوبگ ءِ زالبول آنی رکھینگ ءِ واستہ چست کتگیں گامگیج آنی ھوالگ ءَ ھم بریفنگ دیگ بوت۔ مزن وزیر ءَ اے رنگیں واکیہ آنی گر ءُ دار ءُ زالبول آنی رکھینگ ءِ واستہ زوتیں ءُ ترندیں گامگیج آنی پنت ءُ شون کت۔ مزن وزیر عمران خان ءَ گوشت کہ ملزم آنی ھلاپ ءَ زوتیں کاروائی کنگ بہ بیت۔ مزن وزیر عمران خان ءَ شہری آنی جان ءُ مال ءِ رکھینگ ءِ واستہ گامگیج کنگ ءِ پنت ءُ شون کت۔
