اسلام آباد۔ 24 اگست (اے پی پی) وزیرخارجہ مخدوم شاہ محمود قریشی تون اونا آسٹریلین ہم منصب ماریس پین سے شنبے نادے آ ٹیل فون آ رابطہ کرے۔ دفترخارجہ نا رداٹ وزیرخارجہ غاتا نیام اٹ ہڑتوم آ کنڈآتا تعلقداری، اوغانستان نا بدل مروک آ حالیت آتون اوار تین پہ تینی است خواہی نا باندات آ گپ وتران مس۔ شاہ محمود قریشی پارے کہ پاکستان، اوغانستان نا بابت اجتماعیت تخوک، جامع سیاسی ایسر نا مخ تف ءِ۔ ساڑی آ حالیت آتا رداٹ، گرج داہیت انا ءِ کہ اوغان تا سیکورٹی و اوفتا حق انا رکھ ءِ پک کننگے۔ اوپارے کہ اوغان سرکڑدہ غاتا کنڈآن مون آ بروک آ ساڑی آ بیانک است بڈی نا سوب ءُ، جہانی برادری ءِ اوغانستان نا پوسکن تفنگ و اوغان تا زرگزرانی بحالی کن گچین گام گیج کننگ نا گرج ءِ۔ وزیرخارجہ آسٹریلوی ہم منصب ءِ کابل آن چندی ملک آتا سفارتی عملہ، جہانی ادارہ غاتا کارندہ و میڈیا نمائندہ غاتا زوت پیش تمنگ نا چرجوئی ٹی برجا پاکستانی کمکاری آن معلومدار کرے۔ وزیرخارجہ پارے کہ پاکستان، آسٹریلیا تون ہڑتوم آ کنڈآتا تعلقداری تے خاص اہمیت ایتک وخت اس کہ پاکستان و آسٹریلیا نا نیام اٹ سیاسی، اقتصادی و تہذیبی بابت ہڑتوم آ کنڈآتا کمکاری ءِ ودفنگ نا بھلو وارخواہی اس ساڑی ءِ۔ ہڑتوم آ وزیر خارجہ غاک پاکستان و آسٹریلیا نا نیام اٹ ہڑتوم آ کنڈآتا تعلقداری تا ساڑی آ وڑآ است جمی نا درشانی ءِ کرسا اوفتے پین سوگو کننگ کن بڑزکو کہولی رابطہ غاتا مون آ دننگ آ زور شاغار۔ آسٹریلوی وزیرخارجہ کابل آن پیش تمنگ نا عمل اٹ کمک فراوان کننگ آ وزیر خارجہ مخدوم شاہ محمود قریشی و پاکستانی سرکڑدہ غاتا منت واری ءِ ہرفے۔
