اسلام آباد۔ 24اگست (اے پی پی) بنجائی وزیر ڈٹ بندی شونداری و اصلاحات و خصوصی گام گیج و نیشنل کمانڈ اینڈ آپریشن سینٹر نا سروک اسد عمر پارینے کہ 30ستمبر آن پد کورونا ویکسی نیشن آن بیدس ہوائی سفر آ پابندی مریک، ہوٹل، گیسٹ ہاؤس و شادی ہال تیٹی بروک آتا ویکسی نیشن المی ءِ، 17سال آن زیات وئی نا طالب علم آتے کن ویکسی نیشن ءِ المی گوندنگانے، طالب علم آتا ٹرانسپورٹیشن عملہ ءِ 31اگست اسکان ویکسین خلفوئی مریک۔ سے شنبے نادے آ وزیراعظم نا خصوصی کمکار قومی جان جوڑی فیصل سلطان تون اوار میڈیا ءِ حوال ترسا بنجائی وزیر پارے کہ 31اگست آن پد اسکول ٹرانسپورٹر ویکسین آن بیدس کاریم کننگ کپسہ، اسکول وین ڈیور آتے کن ہم ویکسی نیشن ءِ المی گوندنگانے، ہوٹل و شادی ہال تیٹی بروک آتے کن 30ستمبر اسکان ویکسی نیشن المی مریک۔ اسد عمر نا پاننگ ئس کہ 15اکتوبر آن پد موٹروے آ سفر کن ویکسی نیشن ءِ المی گوندنگانے، 15اکتوبر آن پد بیدس ویکسی نیشن پبلک ٹرانسپورٹ اٹ سفر نا موکل مفک، 17سال یا زیات وئی نا طالب علم آک 15ستمبر اسکان ویکسین المی خلفر، حکومت کن ہرپاکستانی ناجان جوڑی اہم ءِ، تعلیمی ادارہ غاتے ٹی 89درسد استاد و عملہ نا ویکسی نیشن مسنے، دین انا سوب آن ہرابندش آتے خلنگ انگ ءِ او الس نا فائدہ ٹی ءُ۔ بنجائی وزیر پارے کہ حکومت نا بھلا سرسہبی دنیا ٹی پاکستان ناشرف ءِ بحال کننگ ءِ، کورونا چیلنج نا مقابلہ پاکستان نا بھلو سرسہبی اسے۔ کورونا دین اٹی پاکستان نا حکمت عملی نا دنیا ستاءِ کرینے، پاکستان آن داسہ کس اس ڈومور نا خواست کپک، اوغانستان نا حالیت پاکستان کن ہم بھلو چیلنج اس مریک۔ بنجائی وزیر پارے کہ وزیراعظم نا است خواہی نا رداٹ احتسا ب نا نتیجہ مون آ بتو، انصاف نا نظام اٹی گچینی کن پین گام گیج آتا گرج ءِ، اسدعمر پارے کہ زرگزران بھلو مشکل وخت اسے آن گدرینگسا گچین مننگ ءِ، پک کینہ کہ پیشن نا نسخان دُوارہ خطرناک حداسکان ہنپ، 30سال اٹی اسہ ہچ ءُ دن ءُ حکومت اس بتنے ہراآئی ایم ایف آ ہنپ۔ اوپارے کہ اوغان حالیت آتا رداٹ پاکستان اٹی حالیت آتے سنبھالنگ چیلنج اس مریک، اوغانستان اٹی امن آن سی پیک روٹ انا اہمیت پین ودک۔ داوخت آ وزیراعظم نا خصوصی کمکار ہیلتھ فیصل سلطان پارے کہ یکم ستمبر آن 17سال آن بڑز ورناتے کن ویکسی نیشن نابناءِ کننگ اُن، نزور دفاعی نظام نا حامل ورناتے کن خاص ءُ ویکسی نیشن اسے نا بناءِ کننگ اُن، پین ملک اسے آن ویکسی نیشن کرفوک آ بندغ آتا اندراج ہم نادرا ویب سائٹ آ مننگ کیک، ویکسین خلفبو و اصل کورونا ویکسی نیشن سرٹیفکیٹ ءِ نادرا ویب سائٹ آن دوئی کبو۔
