نیویارک۔ 24اگست (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ پاکستان علاقائی ملک و جہانی برادری تون سلابت آن پد اوغانستان اٹی طالبان تا حکومت ءِ امنا کیک۔ بی بی سی ءِ اسہ انٹرویو اسے ٹی پوسکن آ اوغان حکومت ءِ امنا کننگ نا بابت پاکستان نا تینٹ فیصلہ کننگ یا جہانی برادری نا فیصلہ تون ہِننگ آ ہریفوک آ سوج انا ورندی ٹی پارے کہ پاکستان جہانی برادری نا سلابت اٹ فیصلہ کیک و داچرجوئی ٹی نن علاقائی ملک آتون اوار اوار جہانی برادری تون کاریم کننگ اُن تانکہ اوغانستان اٹی امن و سوگوی ءِ پک کننگ مرے۔ اوپارے کہ اودے اومیت ءِ کہ طالبانک جامع حکومت اس جوڑ کیرہ و داکہ اواوغانستان اٹی انسانی حق ءِ پک کننگ و جہانی برادری تون کروک آ قول آتا شرف ءِ کیرہ۔ اوپارے کہ پاکستان اوغانستان آن سفارتکار، جہانی ایجنسی تا ملازم و صحافی تا پیش تمنگ اٹ ہم کمک کننگ ءِ و دا چرجوئی ٹی پاکستان انٹرنیشنل ایئر لائن(پی آئی اے) دے اٹی 3جہاز چلیفنگ ءِ۔ اوپارے کہ کابل اٹی پاکستانی سفارت خانہ ملوک ءِ و اختہ مروک آ وویزہ نا درخواست آتیا کارروائی کننگ ءِ و پی آئی اے نا جہاز آتا کمک اٹ اوغانستان آن داتم اسکان 1500آن زیات بندغ آتے کشنگانے۔ پاکستانی مندوب منیر اکرم پارے کہ دہشت گردآتا ہروڑنا سرجزءِ توننگ کن اوغانستان تون پاکستان نا سیم آ سخت سیکورٹی بست وبند کننگانے۔
