اسلام آباد۔ 24اگست (اے پی پی) جہانی مالیاتی فنڈ(آئی ایم ایف) نا کنڈآن پاکستان ءِ 2.75ارب ڈالر نا کمک دوئی مسنے۔ داہیت ءِ ترجمان اسٹیٹ بینک ٹویٹر آ جاری ٹویٹ اٹی پارینے۔ آئی ایم ایف نا بورڈ داکان مست تینا باسک ملک آتے کورونا دین انا جہانی دین آن ودی مروک آ مشکل و چیلنج آتون مون تننگ کن جم وڑاٹ 650ارب ڈالر نا کمکاری نا پڑو کریسس، اسٹیٹ بینک انا رداٹ پاکستان ءِ داکمکاری آن 2.75ارب ڈالر دوئی مسنے۔ داکمکاری اسٹیٹ بینک ءِ براہ راست دوئی مسنے و داڑآن نئے بیرہ زرمبادلہ نا کوڑی تیٹی ودکی مریک بلکن ملکی زرگزران آہم جوان ءُ اثراس تمک۔ جہانی مالیاتی فنڈ انا بورڈ غٹ ملک آتے کن 650ارب ڈالر نا ہرا پیکج نا پڑو ءِ کرینے اوفتیان پاکستان ءِ 4.3درسد نا کچ اٹ 2.75ارب ڈالر نا کمک ملانے، داکمک کن ہچ وڑنا شڑت اس عائد کننگتنے و دانا خڑچ آک ہم صفر ءُ، داکمک آن پاکستان نا زرمبادلہ نا کوڑی تیٹی پین ودکی مریک ہراستاکڑزوک ءُ ہیت اسے۔
