اسلام آباد۔ 23اگست (اے پی پی) وزیراعظم عمران خان قومی اسہ وڑ نصاب تعلیم آ عملدرآمد نا عمل ءِ صوبائی حکومت آتا شریداری اٹ زوت پورو کننگ نا پارت کرینے۔ داپارت ءِ وزیراعظم دوشنبے نادے آ قومی اسہ وڑ نصاب تعلیم آ عملدرآمد نا بابت تینا کماشی ٹی جاچ دیوان اٹی تس۔ دیوان اٹی بنجائی وزیر شفقت محمود، خصوصی کمکار ڈاکٹر شہباز گل، پارلیمانی سیکرٹری وجیہہ اکرم و بنجائی وزارت تعلیم نا سینئر آفیسر آک ساڑی ئسر۔ بنجائی وزیر شفقت محمود دیوان ءِ نصاب تعلیم اٹی اوار سیرت النبی ﷺ نا تعلیمات آتا بابت سرجم حوال تس۔ دارداٹ غٹ مکتبہ فکر خاص وڑاٹ عالم دین تتون سرجم سلابت کننگانے۔ استاد آتا ٹریننگ و امتحان تا آب آ چکار کننگانے۔ وزیراعظم عمران خان پارے کہ سیرت النبی ﷺ ہی ننا پوسکن آ چین اکن کسرنا ڈیواءِ۔ نبی آخر الزماں ﷺ نا سیرت نا غٹ آن اہم پہلو اخلاق و آداب و حسن معاشرت ءِ۔ اوپارے کہ غٹ معاشرتی ویل آتا گچین ایسر سیرت النبی ﷺ نا تعلیمات آتے ٹی ساڑی ءِ۔ تاریخ اسلام تون اوار اوار رسول اللہ ﷺ نا حیات مبارکہ تون ماخوذ روشنا اصول چناتے خوانفنگے و پہہ کننگے۔ وزیراعظم پارت کرے کہ قومی اسہ وڑ نصاب تعلیم آ عملدرآمد نا عمل ءِ صوبائی حکومت آتا شریداری اٹ زوت پورو کننگے۔
