اسلام آباد۔ 23اگست (اے پی پی) صدر مملکت ڈاکٹر عارف علوی پارینے کہ پاکستان آسٹریلیا تون تینا تعلقداری تے بھاز اہمیت ایتک و تین پہ تینی است خواہی نا غٹ بشخ آتے ٹی آسٹریلیا تون ہڑتوم آ کنڈآتا کمکاری ءِ پین سوگو کننگ خوانہ۔ تعلیم و کسبی تربیت نا بشخ آتے ٹی آسٹریلیا تون کمکاری ءِ مون آ دننگ نا گرج ءِ ہرا پاکستان نا راجی و اقتصادی شونداری ٹی کمکار مریک۔ صدر داخیال آتا درشانی ءِ وزارت خارجہ نا دزکش مروک آ ترجمان و آسٹریلیا ٹی پاکستان نا پندار ہائی کمشنر زاہد حفیظ چوہدری تون گپ وتران کرسا کرے ہرادوشنبے نادے آ ایوان صدر اٹی اوڑتون اوڑدہی کرے۔ ہڑتوم آ ملک آتا نیام اٹ ہڑتوم آ کنڈآتا تعلقداری نا چندی پلو آتیا گپ وتران کرسا صدر زور شاغا کہ پاکستان و آسٹریلیا نا نیام اٹ واپاری و اقتصادی کمکاری ءِ ودفنگ نا بھلو گمان اس ارے۔ اومستی پارے کہ پاکستان آسٹریلیا تون چندی بشخ خاص وڑاٹ تعلیم، کشت وکشار، واپار، دیر انا بست وبند، کانڑ کنی و انفارمیشن ٹیکنالوجی(آئی ٹی) ٹی ہڑتوم آ کنڈآتا کمکاری ءِ ودفنگ خواہک۔ او آسٹریلیا غان پاکستان اٹی زرکاری ءِ راغب کننگ نا گرج آ ہم زورشاغا، اومستی پارے کہ ملک کاروباری دوستانہ پالیسی تے تینا کرے و تینا چکار ءِ جیو سیاست آن جیو اکنامکس آ گدریفے۔ حکومت نا کنڈآن پیشن نا ملک رہینگوک آ پاکستانی تا مثبت کڑد انا است بڈی نا حوالہ ءِ ترسا صدر مملکت پندار ہائی کمشنر ءِ پارے کہ او آسٹریلیا ٹی پاکستانی شاری تا آسراتی و راجی آسراتی کن کاریم کے و اوفتے ہرممکن کمک و خذمت فراوان کے۔ آسٹریلیا ٹی پاکستانی طالب علم آتا قابل ذکر کچ انا رداٹ اوہڑتوم آ ملک آتا نیام اٹ تعلیمی کمکاری ءِ پین ودفنگ نا گرج ءِ تالان کرے۔ صدر مملکت زاہد حفیظ چوہدری ءِ آسٹریلیا ٹی پاکستان نا ہائی کمشنر نا وڑاٹ تقرری آ مبارکبادی تس و اودے پارے کہ او پاکستان آسٹریلیا کمکاری ءِ پین سوگو کننگ اٹ تینا کڑد ءِ اداکے۔ اودفترخارجہ نا ترجمان نا وڑاٹ تینا فرض ءِ گچین وڑاٹ سرتننگ آ زاہد حفیظ چوہدری نا ستاءِ کرے و دااومیت نا درشانی ءِ کرے کہ او ہندا جوزہ اتون آسٹریلیاٹی پاکستان نا ہائی کمشنر نا فرض ءِ سرایتک۔
