اسلام آباد۔ 23اگست (اے پی پی) وزیر داخلہ شیخ رشید احمد پارینے کہ سی پیک ننا زرگزرانی شونداری کن شہ رگ انا حیثیت تخک، چینی شاری تے ہروڑنا سیکورٹی فراوان کینہ، اوغانستان اٹی امن و سوگوی کن دنیا تون اواری اٹ کاریم کینہ، اوغان کمامدارآک باور کرفینو کہ اوغانستان نا گل زمین ءِ ہچ ءُ حالیت اسے ٹی ملک اسے نا برخلاف کاریم اٹ اتنگ نا موکل تفننگک۔ اوغانستان آن بروک آتے کن وزارت داخلہ آسراتی ہند اس جوڑ کرینے۔ دوشنبے نادے آ داڑے پریس کانفرنس آن تران کرسا وزیر داخلہ پارے کہ نن اوغانستان اٹی امن، سوگوی و اونا سالمیت کن نئے بیرہ دعا کینہ بلکن ننا است خواہی ءِ کہ اوغانستان نا امن پاکستان نا امن تون گنڈوک ءِ و پاکستان دنیا تون اواری اٹ اوغانستان اٹی امن خواہک۔ اوپارے کہ اوغانستان بارڈر نا حالیت آتے وزارت ہُننگ ءِ۔ اوپارے کہ نن ہشت پوسکن ءُ ڈرون ہلنگ نا فیصلہ کرینن، 192کیمرہ و 1122مچ آ سسٹم پنجاب نا وڑآ اسلام آباد اٹی ہندا تُوبناءِ کننگ ءِ، داملک انا بدنصیبی دادے کہ 74سال آن کرائسز مینجمنٹ نا ہچ ءُ سسٹم اس جوڑ متو، داڑے نوکاپ آن اِرابندغ زوال کریر۔ وزیر داخلہ پارے کہ سی پیک ننا زرگزرانی شونداری کن شہ رگ انا حیثیت تخک، گڑاس خواتورہ کہ سی پیک مون آ کائے، چینی شاری تے ہروڑنا سیکورٹی فراوان کینہ، پاک چین سنگتی کوہ ہمالیہ غان بڑز، سمندرآن کڑمب و شاد آن ہنین ءِ، وزیراعظم عمران خان نا عزم ءِ کہ سی پیک ءِ مون آ دین۔ اوپارے کہ سی پیک نا برخلاف سازش مننگ ءِ، اوغانستان نا ساڑی حالیت آتا سوب آن سی پیک بھاز اہم مریک۔ اوپارے کہ چین ننا خڑک انا سنگت ملک ءِ، تدوک آ اسہ تُو آن داسو، کراچی اسٹاک ایکس چینج، کوئٹہ سرینا ہوٹل کون آ واقعہ غاتا حالیت اٹی سازش آتا بے سہبی ننا بے مٹ سنگتی نا شاہدی ءِ۔ اوپارے کہ چین انا شاری تے ہروڑنا سیکورٹی فراوان کننگک، پاکستان نا غٹ ادارہ غاک داڑآ کاریم کننگ ءُ، پاکستان نا موقف پیدوار ءِ، نن خوانہ کہ مخلوق ءِ آسراتی ایتن، پاکستان دنیا تون سلوک ءِ، دنیا ٹی ساڑی آ حالیت آتا سوب آن نن اوغانستان اٹی امن خوانہ، ننے اگہ پین اوغانستان ءِ پین ویزہ جاری کروئی تما تو کینہ، نن اوغانستان نا کرکٹ ٹیم ءِ ہم ویزہ جاری کرینن، پاکستان دنیا تون اواری اٹ اوغانستان اٹی امن خواہک۔ اوپارے کہ کابل نا چندی علاقہ غاتیان مخلوق ءِ بالی پٹ اسکان سرکننگ ننا زمواری اف، ننا زمواری طورخم بارڈر اسکان ءِ۔ اسہ سوج اسے نا ورندی ٹی وزیر داخلہ پارے کہ مہاجر آتا بابت داسکان فیصلہ متنے، دابابت آن فیصلہ حکومت کیک ہرا بارڈراسکان مخلوق بریک اوفتے آسراتی ایتنہ۔ اوپارے کہ 1200آن زیات درملکی و اوغان مخلوق دانگیا بسنو و 800آن زیات طورخم بارڈر نا کسر اٹ بسنو، دابابت حکومت نا پارت آ وزارت داخلہ آسراتی ہند اس جوڑ کرینے، اوٹی آئی ٹی و ایلو وزارت آک اوار مریرہ۔ اسہ سوج اسے نا ورندی ٹی اوپارے کہ ہرافتا ویزہ غاتا مد چٹانے، وزارت اوفتے 30اگست اسکان جرمانہ نا معافی تسنے انتئے کہ چندی مخلوق تون جرمانہ نا پیسہ الوکہ ہنداخاطرآن پین اڈکننگ نا موکل تفننگ انگ ءِ۔ وزیر داخلہ شیخ رشید احمد اسہ سوج اسے نا ورندی ٹی پارے کہ ننے آن مریم نواز موکل خواتو، اگہ او موکل خواہاکہ تو دا معاملہ ءِ کابینہ نا گدرفینگاکہ، شہباز شریف نا درخواست نا وخت گدرینگانے۔
