اسلام آباد۔ 23اگست (اے پی پی) اسلامی نظریاتی کونسل نا چیئرمین ڈاکٹر قبلہ ایاز وزیراعظم عمران خان نا سیرت رسول صلی اللہ علیہ و آلہ وسلم نا ہشت آن دہ جماعت نا نصاب نا بشخ جوڑ کننگ نا فیصلہ نا ستاءِ کرسا پارینے کہ داگام گیج ریاست مدینہ نا جوڑ کننگ نا مساعی ٹی اسہ اہم ءُ گام اسے، بنجائی کابینہ تینا17اگست نا دیوان اٹی دافیصلہ ءِ کرسا بھاز جوان ءُ گام اس ہرفینے۔ دوشنبے نادے آ داڑے ترجمان اسلامی نظریاتی کونسل نا کنڈآن جاری بیان نا رداٹ چیئرمین اسلامی نظریاتی کونسل ڈاکٹر قبلہ ایاز داچرجوئی ٹی بنجائی وزیر تعلیم شفقت محمود ءِ باضابطہ چھٹی اس نوشتہ کرینے ہراٹی اسلامی نظریاتی کونسل نا کنڈآن پبی فنی و علمی کمکاری نا سلہ خلنگانے۔ ڈاکٹر قبلہ ایاز سلاہ کرینے کہ سیرت رسول اللہ صلی اللہ علیہ و آلہ وسلم نا نصاب کسہ بیان کننگ نا وڑاٹ ٹہیفنگے ہراکہ ساڑی آ دور اٹی گچین انگا تعلیم نا ذریعہ ءِ۔ داچرجوئی ٹی استاد آتے باقاعدہ ٹریننگ تننگے۔ اسلامی نظریاتی کونسل ٹریننگ نا مواد وعملی گام گیج آتے ٹی پبی کمک کن تیار ءِ۔
