ہراتم ٹی ٹی پی ءِ ہندوستان آن فنڈ ملیپک تو اونا مخ ایہن ہم پِنک، بنجائی وزیر حوالکاری چوہدری فواد حسین نا ٹی آر ٹی ورلڈ اتون گپ وتران

اسلام آباد۔ 20اگست (اے پی پی) بنجائی وزیر حوالکاری و شینکاری چوہدری فواد حسین پارینے کہ ہراتم تحریک طالبان پاکستان (ٹی ٹی پی) ءِ ہندوستان آن فنڈز ہی ملیپک تو اونا مخ ایہن ہم پِنک، نن اوغانستان اٹی اسہ ہندن ءُ حکومت اس خوانہ ہراڑآ اوغانستان اٹی غٹ پڑک آتا امنا مرے، اوغانستان اٹی فیصلہ سازی نا اختیار اوغان الس نا حق ءِ۔ داہیت ءِ او ٹی آر ٹی ورلڈ اتون گپ وتران کرسا پارے۔ بنجائی وزیر حوالکاری پارے کہ نن اوغانستان نا معاملہ غا چین، ترکی، امریکہ، برطانیہ تون اوار غٹ علاقائی ملک آتون رابطہ ٹی اُن، ڈیہہ نا ملک آک اوغانستان اٹی امن و سوگوی کن تینا کڑد ءِ ادا کننگ کیرہ۔ اسہ سوج اسے نا ورندی ٹی چوہدری فواد حسین پارے کہ نن اسہ ہندن ءُ حکمت عملی اس اختیار کننگ نا کوشست کننگ اُن کہ اوغانستان ءِ سوگوی نا کنڈآ دننگ مرے۔ اوپارے کہ پاکستان مثبت حالیت آتا جوڑ کننگ کن کوشست کرے، نن طالبان و امریکہ ءِ مذاکرات آ آمادہ کرین، کابل نا حکومت تون ہم طالبان تا مذاکرات ءِ کرفنگ نا کوشست کرین ولے بدبختی اٹ اشرف غنی نا رویہ سہی الوکہ۔ اوپارے کہ ننا طالبان تیا کنٹرول اف و نئے نن تون طالبان تا بابت فیصلہ کننگ نا اختیار اس ارے۔ اسہ سوج اسے آ اوپارے کہ اوغان طالبان تا ترجمان نا کنڈآن دابیان کہ اوغانستان نا گل زمین ءِ پین ملک اسے نا برخلاف کاریم اٹ اتنگ نا موکل تفننگک، ستاکڑزک۔ اوپارے کہ بھاز انگاک سمجھرہ کہ بھارت اوغانستان اٹی ٹی ٹی پی، بی ایل اے و ایلو دہشت گرد پڑک آتے پاکستان اٹ دہشت گردی کن فنڈنگ کریکہ، اوداسہ چٹانے۔ بنجائی وزیر حوالکاری پارے کہ اوغانستان نا بابت ننا بنداوی شرٹ ءِ کہ اوغانستان نا گل زمین ءِ پین ملک اسے نا برخلاف کاریم اٹ اتنگ نا موکل تفننگک۔