اوغان سیاسی راہشون تا اوغانستان اٹی شریداری اٹ حکومت اس ٹہیفنگ نا گرج آ زور

اسلام آباد۔ 20اگست (اے پی پی) پاکستان نا دورہ غا بروک آ اوغانستان نا سیاسی راہشونک اوغانستان اٹی شریداری اٹ حکومت اس جوڑ کننگ نا گرج آ زور شاغسا پارینو کہ ہراسہ ہمو سیٹ اپ بے سہب مریک ہراٹی اسہ پڑک اسے اوار کننگک۔ اوغان ڈل اٹی ویلیسی جرگہ نا اسپیکر میر رحمان رحمانی، مسکوہی وزیر خارجہ صلاح الدین ربانی، مسکوہی نائب صدر محمد یونس قانونی، استاد محمد کریم خلیلی، احمد ضیاء مسعود، احمد ولی مسعود، عبدالطیف پدمان و خالد نورئسک اوار ءُ۔ ڈل حکومت پاکستان نا سلہ غا پاکستان نا دورہ ءِ کرے۔ ڈل وزیراعظم عمران خان، وزیر خارجہ شاہ محمود قریشی، آرمی چیف جنرل قمر جاوید باجوہ و ڈائریکٹر جنرل آئی ایس آئی لیفٹیننٹ جنرل فیض حمید تون اوار بڑزکو سیاسی و فوجی سرکڑدہ غاتون اوڑدہی کرے۔ مسکوہی نائب صدر محمد یونس قانونی ڈل انا ایلو باسک آتون اوار داڑے پریس کانفرنس آن تران کرسا اوغانستان نا بارواٹ حکومت پاکستان نا مثبت کڑد انا  ستاءِ کرسا پارے کہ اوغانستان اٹی امن کن جامع سیاسی ایسری نا گرج ءِ۔ اوغان راہشونک پاریر کہ پاکستان اٹی پوسکن آ پاکستان نا نظریہ نار داٹ بدلی نظر بننگ ءِ و پاکستان نا سرکڑدہ مستین ءِ پدی ہلسا اوغانستان تون سوگو ہڑتوم آ کنڈآتا تعلقداری نا خواہندار ءِ۔ اوغان ڈل انا باسک آک میڈیا نا نمائندہ غاتے پاریر کہ پاکستان نا دورہ ٹی اوفتا پاکستان نا سرکڑدہ غاتون اوڑدہی ٹی اوغانستان نا پوسکن آ حکومت اٹ غٹ نسلی پڑک آتے نمائندگی تننگ آ گپ وتران مس۔ اوپارے کہ دانا مسخت اوغانستان اٹی خونریزی ءِ بند کننگ ءِ۔ ڈل پاکستان نا سرکڑدہ غاتا کنڈآن پرامن اوغانستان کن باوری کرفنگ آ اوفتا منت واری ءِ ہرفے ہرا سوگو پاکستان کن المی ءِ۔