اسلام آباد۔ 20اگست (اے پی پی) بنجائی وزیر خزانہ و محصولات شوکت ترین پارینے کہ ملک انا زرگزران سہی کنڈآ ہِننگ ءِ و جہانی ادارہ غاک ہم پاکستان نا اقتصادی شونداری ءِ امنا کننگ ءُ۔ اوداہیت ءِ جمعہ نادے آ داڑے گورنر سندھ عمران اسماعیل تون گورنرہاؤس اٹی اوڑدہی ٹی پارے۔ داوخت آ باسک قومی اسمبلی آفتاب حسین صدیقی ہم ساڑی ئسک۔ اوڑدہی ٹی ملک انا جم زرگزران نا حالیت آتون اوار برآمد و پیشن نا ملک آن زررادہ کننگ اٹ سوگوی و گمانی ودکی و تین پہ تینی است خواہی نا ایلو باندات آتیا گپ وتران کننگا۔ وزیرخزانہ گورنر ءِ اقتصادی حالیت و لس بندغ نا مشکل آتے ٹی کمتی کن حکومت نا کنڈآن کروک آ گام گیج آتیان معلومدار کرے وپارے کہ ملکی زرگزران سہی کنڈآ ہِننگ ءِ و جہانی ادارہ غاک پاکستان نا اقتصادی شونداری ءِ امنا کننگ ءُ۔ بنجائی وزیر خزانہ پارے کہ برآمد آتے ٹی ودکی حکومت نا اولیت ءِ و دامسخت نا دوئی کننگ کن گام گیج آتا چرجوئی برجاءِ ہرانا مثبت بھرم مون آ بننگ ءِ۔ گورنر سندھ دا وخت آپارے کہ کورونا دین اٹی چنکا و نیامی درجہ نا کاروبار نا رکھ اتون اوار پیشن نا ملک رہینگوک آ پاکستانی تیکن روشن ڈیجیٹل اکاؤنٹس نا رداٹ وزارت خزانہ نا کوشست آک سفت نا قابل ءُ۔ اوپارے کہ جہانی دینی چیلنج آن پد ہم زرمبادلہ نا کچ و ترسیلات زر اٹی ودکی، پیشن نا ملک رہینگوک آ پاکستانی تا ساڑی حکومت نا زرگزرانی پالیسی تیا پت انا درشانی ءِ۔
